ENE ÝER — UMUMY ÖÝÜMIZ WE MUKADDESLIGIMIZ
Her ýylyň 22-nji aprelinde dünýä jemgyýetçiligi iň uly ekologiýa senelerinden biri bolan Halkara Ene Ýer gününi dabaraly belleýär. Bu sene adamzadyň ünsüni tebigaty goramaga, ekologiýa durnuklylygyny üpjün etmäge we biziň umumy öýümiz bolan Ýer togalagyna söýgi bilen çemeleşmäge çagyrýar.
Birleşen Milletler Guramasynyň Baş Assambleýasynyň karary bilen döredilen bu halkara güni, adamzat bilen tebigatyň arasyndaky sazlaşygy dikeltmegiň zerurdygyny ýatladýar. “Ene Ýer” adalgasynyň özi hem bu mukaddeslige bolan hormatyň, sarpanyň we biziň ählimiziň tebigat bilen aýrylmaz baglanyşykdygymyzyň nyşanydyr.
Häzirki wagtda global derejede ýüze çykýan klimat çalşygy, biodürlüligiň azalmagy we daşky gurşawyň hapalanmagy ýaly meseleler her bir ynsandan jogapkärçilikli bolmagy talap edýär. Halkara Ene Ýer güni diňe bir baýramçylyk däl-de, eýsem, tebigatyň baýlyklaryny tygşytly ulanmak, ekoulgamlary dikeltmek we ekologiýa taýdan arassa tehnologiýalary durmuşa ornaşdyrmak ugrunda bitirilýän işleriň jemidir.
Türkmenistanda daşky gurşawy goramak we tebigata aýawly çemeleşmek döwlet syýasatynyň ileri tutulýan ugurlarynyň biridir. Hormatly Prezidentimiziň baştutanlygynda ýurdumyzda giň gerimli tokaý zolaklary döredilýär, suw serişdelerini tygşytly ulanmagyň iň döwrebap usullary ornaşdyrylýar. Ýurdumyzyň her bir künjeginde her ýyl ekilýän millionlarça düýp bag nahallary “Ýaşyl guşagyň” has-da giňelmegine we ekologiýa abadançylygyna uly goşant bolup durýar.
Her birimiziň ekýän bir düýp bagymyz, tygşytlaýan suwumyz, tebigata ýetirýän kiçijik kömegimiz umumy öýümiziň geljegi üçin ädilen uly ädimdir. Tebigaty söýmek we ony gorap saklamak — diňe bir borç däl, eýsem, geljekki nesilleriň öňündäki mukaddes jogapkärçiligimizdir.
Goý, biziň Ene Ýerimiz hemişe gül-gülüstanlyga bürensin, adamlaryň kalbynda bolsa tebigata bolan çäksiz söýgi we hormat hemişelik orun alsyn!
Aýperi AKMYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 2-nji ýyl talyby.