Dostlukly gatnaşyklaryň bilim daragty
2024-nji ýylyň 30-njy oktýabrynda Hytaý Halk Respublikasynyň Türkmenistandaky Ilçihanasynyň guramagynda “Merkezi Aziýa ýurtlaryň hytaý dilini öwredýän mugallymlary üçin hytaý dilini okatmak” atly okuw maslahaty HHR-nyň "Pekiniň hytaý dili we medeniýeti" atly ýokary okuw mekdebinde öz işine başlady. Iki hepde dowam etjek bu okuw maslahatyna Türkmenistanyň dört sany ýokary okuw mekdebiniň wekilleri, ýagny, Magtymguly adyndaky Türkmen döwlet uniwersitetiniň, Ýagşygeldi Kakaýew adyndaky Halkara nebìt we gaz uniwersitetiniň, Türkmenistanyň Daşary işleri ministrliginiň Halkara gatnaşyklary institutynyň, Türkmen döwlet ykdysadyýet we dolandyryş institutynyň hytaý dili mugallymlary gatnaşmak üçin ýörite iş sapary bilen Hytaý döwletine geldi. Şonuň ýaly-da, bu bilim merkezi Özbegistan, Gazagystan, Täjigistan ýaly döwletleriň wekillerini hem bir ýere jemledi.
Okuw maksatnamasyna laýyklykda 2024-nji ýylyň 30-njy oktýabrynda bu okuw maslahatynyň açylyş dabarasy boldy. Bilim edarasynyň baş binasynda ýokary okuw mekdebinde bilim berýän mugallymlaryň ýolbaşçy düzümi gezekli-gezegine çykyş etdi. Guralýan her bir şeýle okuwlaryň maksady, tejribe alyşmakdaky ähmiýetiniň üstünde giňişleýin durup geçdiler. Duşuşygyň dowamynda her bir gelen wekil bilen aýratynlykda tanşyldy.
Köp taraplaýyn alnyp barylýan türkmen-hytaý gatnaşyklary her bir pudak boýunça işjeňlik häsiýetine eýedir. Bilim hyzmatdaşlygy bolsa döwür bilen aýakdaşlykda esasy üns merkezinde saklanýar. Bu babatda hormatly Prezidentimiziň alyp barýan döwlet syýasaty, dost-doganlyk gatnaşyklary mäkäm binýat bolup hyzmat edýär. Şeýle şertlerde bilim ulgamynyň hünärmenleri üçin hem giň mümkinçilikler döredilýär. Ýokary okuw mekdepleriniň mugallymlarynyň hünär taýdan kämilleşdirilmegi üçin ýörite guralýan şeýle okuw saparlary bolsa tejribe alyşmakda, dostlugy has-da berkitmekde möhüm hyzmaty ýerine ýetirýär.
Mähriban GELENOWA,
Türkmenistanyň Daşary işler ministrliginiň
Halkara gatnaşyklary institutynyň uly mugallymy.