Döredijilik duşuşygy geçirildi
2021-nji ýylyň 15-nji iýunynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Zenanlar birleşiginiň merkezi geňeşiniň, Magtymguly adyndaky Ýaşlar guramasynyň, şeýle hem Halkara gatnaşyklary institutynyň bilelikde guramagynda Türkmenistanyň Garaşsyzlygynyň şanly 30 ýyllygy, Medeniýet we sungat işgärleriniň güni hem-de Magtymguly Pyragynyň şygryýet güni mynasybetli “Medeni diplomatiýa – halklaryň dostluk köprüsi” atly döredijilik duşuşygy geçirildi.
Jemile Pürjäýewanyň alyp barmagynda geçirilen bu duşuşykda “Zenan kalby” žurnalynyň habarçysy Ogulbaýram Taganowa, Türkmenistanyň Döwlet medeniýet merkeziniň Döwlet kitaphanasynyň kitaphanaçysy, şahyr Nyýazbibi Orazowa dagylar hormatly Prezidentimiziň kitaplarynda beýan edilýän millilik ýörelgelerine esaslanyp çykyş etdiler. Duşuşygyň barşynda institutymyzyň çeper höwesjeňleri şowhunly aýdym-sazlary, ajaýyp tanslary ýerine ýetirdiler. Döredijilik duşuşygynyň ahyrynda oňa gatnaşyjylar tarapyndan milli Liderimize hoşallyk sözleri aýdyldy. Bu döredijilik duşuşygy “Aşgabat” teleýaýlymy tarapyndan ýazgy edildi.
Gytja ATDAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.