BMG – niň gününe bagyşlanan çäre
2022-nji ýylyň 21-nji oktýabrynda Türkmenistanyň Daşary işler ministrliginiň Halkara gatnaşyklary institutynda Halkara gatnaşyklary fakultetiniň gurnamagynda “BMG-niň döreýşiniň taryhy, aýratyn protokol düzgünleri” atly açyk sapak geçirildi. Bu okuw sapagyna talyp ýaşlar we mekdep okuwçylary gatnaşdylar.
Onda Halkara gatnaşyklary we diplomatiýa kafedrasynyň mugallymy Rahym Akmuradow Birleşen Milletler Guramasynyň döreýiş taryhy, guramanyň düzümi we onuň halkara gatnaşyklarynda alyp barýan işleri hakynda çykyş etdi.
Mundan başga-da, institutyň çäginde halkara gatnaşyklary, halkara hukugy, halkara ykdysady gatnaşyklary we halkara žurnalistikasy fakultetleriniň talyp ýaşlarynyň gurnamagynda mekdep okuwçylary üçin sergi geçirildi.
Ýeri gelende bellesek, Birleşen Milletler Guramasy 1945-nji ýylyň 24-nji oktýabrynda döredilip, onuň esasy wezipesi dünýäde parahatçylygy goramakdan, döwletleriň arasynda dostlugy berkitmekden we hyzmatdaşlygy ösdürmekden ybaratdyr. Bu guramanyň çäklerinde Bitarap Türkmenistan hem parahatçylyk, howpsuzlyk we durnukly ösüş babatda birnäçe başlangyçlary öňe sürýär.
Hojamyrat BAÝLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.