Akademiki bileleşigiň ulgamynyň «Hünärmenleriň platformasy – akademiki bileleşigiň ulgamyny berkitmek» atly taslama boýunça ilkinji duşuşygy
2022-nji ýylyň 9-njy iýunynda Täjigistanyň Duşanbe şäherinde göni wideoaragatnaşyk arkaly Akademiki bileleşigiň ulgamynyň “Hünärmenleriň platformasy – akademiki bileleşigiň ulgamyny berkitmek” atly taslama boýunça ilkinji duşuşygy geçirildi. Onlaýn duşuşyk USAID-iň suw we daşky gurşaw boýunça sebitleýin taslamasy, Merkezi Aziýanyň sebitleýin ekologik merkezi (CAREC), Merkezi Aziýadaky “SDC Blue Peace” taslamasy we Ýewropa bileleşiginiň “Pudagara maliýeleşdirmegi ösdürmek üçin suw-energiýa-azyk (SEA) Merkezi Aziýa Dialogy” taslamasy bilen hyzmatdaşlykda guraldy. Duşuşyga CAC-yň agzalary we Merkezi Aziýa uniwersitetleriniň wekilleri, ÝB-niň Täjigistandaky we Gazagystandaky wekilleri, USAID-iň sebitleýin suw we daşky gurşaw taslamasynyň topary, CAREC-iň topary, Şweýsariýanyň ösüş we hyzmatdaşlyk gullugynyň wekilleri, şeýle hem Türkmenistanyň Daşary işler ministrliginiň Halkara gatnaşyklary institutynyň mugallymlary gatnaşdylar.
Bu duşuşygyň esasy maksady we wezipesi bilelikde geçirilýän çäreleriň maksatnamalary we göz öňünde tutulýan netijeleri bilen alyş-çalyş etmek hem-de Akademiki bileleşigiň ulgamynyň indiki göz öňünde tutýan esasy meselelerini ara alyp maslahatlaşmak bolup durýar. Onlaýn duşuşygyň dowamynda gatnaşyjylar häzirki wagtda ýüze çykýan suw meseleleri boýunça hünärmenleri taýýarlamakda Merkezi Aziýanyň bilim ulgamynyň aýratyn orny barada durup geçdiler, şeýle hem Merkezi Aziýanyň bilim pudagynyň ösüp barýan dünýäniň talaplaryna laýyk gelýän hünärmenleri taýýarlamakdaky ornuny göz öňünde tutup birnäçe üýtgeşmeleri girizmek teklip edildi. Yzygiderli ösýän dünýäde Akademiki bileleşigiň ulgamynyň wezipeleri diňe bir bar bolan ylmyň ösüşini üpjün etmek we gorap saklamak bilen çäklenmän, ýüze çykýan meseleleri çözmegiň täzeçe ugurlaryny işläp düzmek we olary durmuşa geçirmek ýaly wezipeleri hem öz içine alýar.
Dilnoza MUHADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 2-nji ýyl talyby.