Ylhamly ýaşlar bilen geçirilen duşuşyk
2023-nji ýylyň 26-njy aprelinde Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynda bu institutyň we Türkmenistanyň Magtymguly adyndaky Ýaşlar guramasynyň Merkezi Geňeşiniň ýanyndaky «Arkadagly Ýaşlar» atly elektron žurnalynyň bilelikde guramagynda döredijilik bilen meşgullanýan ýaşlaryň arasynda döredijilik duşuşygy geçirildi. Oňa ýurdumyzyň ýokary okuw mekdeplerinde, şol sanda Türkmenistanyň Daşary işler ministrliginiň Halkara gatnaşyklary institutyň talyp ýaşlary hem gatnaşdylar.
Geçirilen duşuşygyň maksady türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň başlyklyk etmeginde geçirilen Halk Maslahatyň mejlisinde öňde goýulan wezipelerden ugur alyp, ýaşlaryň döredijilik ukyplaryny ýokarlandyrmakdan, olaryň ykdysadyýetimiz bilen bir hatarda sazlaşykly ösýän milli medeniýetimize we sungatymyza, şeýle hem türkmen edebiýatyna bolan höwesini artdyrmakdan ybarat boldy.
Duşuşygyň dowamynda çykyş edenler ýurdumyzda Gahryman Arkadagymyzyň, hormatly Prezidentimiziň ýaşlaryň döredijilik bilen meşgullanmaklary üçin döredip berýän giň mümkinçiliklerini aýratyn nygtap geçdiler. Şunuň bilen bir hatarda, Türkmenistanyň Magtymguly adyndaky Ýaşlar guramasynyň Merkezi Geňeşiniň ýanyndaky «Arkadagly Ýaşlar» atly elektron žurnalynyň ýaşlar bilen alyp barýan işleri dogrusynda aýdylyp geçildi.
Döredijilik duşuşygynyň ahyrynda Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň esasy ylmy işgäri, filologiýa ylymlarynyň kandidanty Täzegül Täçmämmedowanyň kitap bolup neşir edilen ylmy eseri talyp ýaşlara gowşuryldy.
Gytja ATDAÝEWA,
Türkmenistanyň Daşary işler ministrliginiň
Halkara gatnaşyklary institutyň
Halkara žurnalistikasy III ýyl talyby.