ÝAŞLARYŇ DÖREDIJILIK BIRLEŞMESINIŇ BIRINJI DUŞUŞYGY
2023-nji ýylyň 1-nji aprelinde Erkin döredijilik mekanynyň mejlisler zalynda “Türkmenistan” gazetiniň redaksiýasynyň ýanynda döredilen Ýaşlaryň döredijilik birleşmesiniň birinji duşuşygy geçirildi. Oňa ýurdumyzyň ussat žurnalistleri, halypa ýazyjy-şahyrlary we ýokary okuw mekdepleriniň žurnalistika hünärinde bilim alýan talyp ýaşlary gatnaşdylar.
Duşuşygyň dowamynda çykyş eden ussat žurnalistler, halypa ýazyjy-şahyrlar žurnalistika, ýazyjylyk bilen ykbalyny baglajak, döredijilik bilen meşgullanýan talyp ýaşlara özleriniň nusgalyk döredijilik ýoly barada täsirli gürrüňleri, gymmatly maslahatlary berdiler.
Ýaşlaryň döredijilik birleşmesi hormatly Prezidentimiziň ýaşlary hemmetaraplaýyn goldamak, döredijilik ulgamynda başarjaň hünärmenleri, zehinli žurnalistleri ýetişdirmek baradaky tabşyryklaryndan we sargytlaryndan ugur alyp, şeýle hem 2023-nji ýyl “Arkadag Serdarly bagtyýar ýaşlar ýyly” diýlip yglan edilmegi mynasybetli döredildi. Ýurdumyzyň dürli künjeklerinde çeper döredijilik bilen gyzyklanýan ýaşlaryň, ýokary okuw mekdeplerinde žurnalistika hünäri boýunça bilim alýan talyplaryň, gazet-žurnallarda zähmet çekýän ýaş žurnalistleriň döredijilik başlangyçlaryny höweslendirmegi, olaryň ukyp-başarnyklarynyň ösmegine ýardam bermegi hem-de bu ugurda halypa-şägirtlik ýörelgesini ösdürmegi maksat edinen bu birleşme şeýle duşuşyklary her aýda yzygiderli geçirmegi göz öňünde tutýar. Munuň özi bolsa geljekde ýurdumyzyň ösüşlerine, içeri we daşary syýasatyna mynasyp derejede seslenip, halka dogry düşündirip biljek zehinli, ýaş žurnalistleriň uly toparynyň emele gelmegindäki nobatdaky ädim bolar.
Duşuşygyň ahyrynda ýaşlar özlerine döredilýän ähli mümkinçilikler, döwlet tarapyndan edilýän aladalar üçin Gahryman Arkadagymyza, Arkadagly Serdarymyza alkyş sözlerini aýtdylar.
Aýlar ATAJYKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.
https://www.atavatan-turkmenistan.com/turkmenistan-gazeti-dususyk-gecirdi/