Türkmenistanyň Konstitusiýasynyň we Türkmenistanyň Döwlet baýdagynyň güni mynasybetli aýdym-sazly dabaraly maslahat geçirildi
2022-nji ýylyň 6-njy maýynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Milli Geňeşi, Türkmenistanyň Baş prokuraturasy, Türkmenistanyň Adalat ministrligi, Türkmenistanyň Daşary işler ministrliginiň Halkara gatnaşyklary instituty Türkmenistanyň Konstitusiýasynyň we Türkmenistanyň Döwlet baýdagynyň güni mynasybetli «Türkmenistanyň Konstitusiýasy adamyň we raýatyň hukuklaryny azatlyklaryny goramagyň we durmuşa geçirmegiň hukuk esaslary» ady bilen aýdym-sazly dabaraly maslahat geçirildi.
Geçirilen dabaraly maslahatda Türkmenistanyň Milli Geňeşiniň Halk Maslahatynyň agzasy Babajyk Babajykow alyp bardy we Türkmenistanyň Milli Geňeşiniň Halk Maslahatynyň agzasy Jeýhun Igdirow, Türkmenistanyň Milli Geňeşiniň Mejlisiniň deputaty Kerimguly Geldiýew, Türkmenistanyň Baş prokuraturasynyň Baş müdirliginiň hukuk üpjünçiligi bölüminiň müdiriniň wezipesini ýerine ýetiriji Nurjemal Baýramowa, Türkmenistanyň Adalat ministrliginiň wekili Nurbike Amanowa, Türkmenistanyň Magtymguly adyndaky Ýaşlar guramasynyň Merkezi Geňeşiniň baş hünärmeni Umyda Kakaýewa hem-de Türkmenistanyň Daşary işler ministrliginiň Halkara gatnaşyklary institutynyň Halkara hukugy we deňeşdirme hukuk öwreniş kafedrasynyň uly mugallymy Merjen Gurbannazarowa bilen institutyň Halkara hukugy fakultetiniň 2-nji ýyl talyby Beggeldi Gutlyýew dagylar çykyş etdiler.
Maslahata gatnaşyjylaryň çykyşlarynda bellenilişi ýaly, ýurdumyzyň mundan 30 ýyl ozal kabul edilen Konstitusiýasy diňe bir Garaşsyzlygyň gazananlaryny berkitmek bilen çäklenmän, türkmen jemgyýetiniň ösüşiniň esasy ugurlary kesgitlendi. Döwletimiziň mizemez hukuk binýady bolmak bilen, Türkmenistanyň Konstitusiýasy halkymyzyň agzybirlik, demokratiýa, ynsanperwerlik, watançylyk hem-de adalatlylyk baradaky arzuwlarynyň beýany bolup durýar.
Ýurdumyzyň Esasy Kanuny döwlet gurluşynyň iň gowy milli we dünýä tejribesini, umumadamzat gymmatlyklarynyň ýörelgelerini özünde jemläp, öz esasy aýratynlyklaryny saklamak bilen bir hatarda, çeýe hukuk guraly bolup durýar, döwrüň talaplaryny hem-de halkara hukugyň umumy ykrar edilen kadalaryny hasaba almak bilen yzygiderli kämilleşdirilýär.
Türkmenistanyň Konstitusiýasynda hormatly Prezidentimiziň syýasatynyň esasy ýörelgesini äşgär açyp görkezýän «Döwlet adam üçindir!» atly şygar doly derejede berkidilendir. Adamy goramak we goldamak, oňa hyzmat etmek döwlet häkimiýet edaralarynyň möhüm wezipeleridir. Bu örän möhüm konstitusion kada öz wagtynda Türkmenistanda adamyň we raýatyň hukuklary, azatlyklary we borçlary baradaky bölümine üýtgetmeleri girizmegiň binýady bolup hyzmat etdi.
Maslahatyň dowamynda institutyň aýdym-saz toparynyň ýerine ýetirmeklerinde ýaňlanan şowhunly aýdymdyr sazlar dabara gatnaşyjylaryň göwünlerini has hem galkyndyrdy.
Çärä gatnaşanlar il bähbitli, dünýä ähmiýetli alyp barýan parasatly syýasaty üçin hormatly Prezidentimiziň janynyň sag, ömrüniň uzak bolmagyny arzuw etdiler.
Merjen GURBANNAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk
öwreniş
kafedrasynyň uly mugallymy.