TALYP ÝAŞLARYŇ YLMA TARAP YNAMLY ÄDIMLERI
2026-njy ýylyň 16-njy aprelinde Döwletmämmet Azady adyndaky Türkmen milli dünýä dilleri institutynda «Ýaşlaryň ylmy-barlag işleri» atly halkara onlaýn ylmy-amaly maslahaty ýokary guramaçylyk derejesinde geçirildi. Türkmenistanyň Bilim ministrligi bilen bilelikde guralan bu çärä ýurdumyzyň hem-de daşary ýurtlaryň — hususan-da, Ýaponiýanyň, Koreýa Respublikasynyň, Hytaý Halk Respublikasynyň, Germaniýanyň, Beýik Britaniýanyň, Russiýa Federasiýasynyň, Özbegistan Respublikasynyň we Gazagystan Respublikasynyň ýokary okuw mekdepleriniň talyp ýaşlary gatnaşdylar.
Maslahata Türkmenistanyň Daşary işler ministrliginiň Halkara gatnaşyklary institutynyň Halkara hukugy fakultetiniň 1-nji ýyl talyby Aýperi Piriýewa we Halkara ykdysady gatnaşyklary fakultetiniň 1-nji ýyl talyby Allanur Şyhyýew gatnaşdylar.
Ylmy-amaly maslahatyň dowamynda talyp ýaşlar dürli ugurlar boýunça çykyş edip, öz ylmy-barlag işleriniň netijelerini tanyşdyrdylar. Çykyşlarda döwrebap bilim ulgamyny kämilleşdirmegiň möhüm meseleleri, daşary ýurt dillerini öwrenmegiň ähmiýeti, medeni gatnaşyklary giňeltmegiň ugurlary hem-de terjimeçilik sungatynyň aýratynlyklary barada giňişleýin durlup geçildi.
Maslahatyň çäklerinde gatnaşyjylaryň arasynda işjeň pikir alyşmalar alnyp baryldy. Bu bolsa ýaşlaryň tejribe taýdan baýlaşmagyna we ylma bolan gyzyklanmalarynyň artmagyna oňyn täsir etdi. Halkara çäre ýaşlaryň döredijilikli pikirlenmegini ösdürmäge, ylmy gözleglere bolan höwesini ýokarlandyrmaga hem-de halkara hyzmatdaşlygy mundan beýläk-de pugtalandyrmaga uly goşant goşdy.
Aýjemal TOWÇAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň 1-nji ýyl talyby.