Sungat hakda täsirli söhbet
2022-nji ýylyň 4-nji oktýabrynda Türkmenistanyň Daşary işler ministrliginiň Halkara gatnaşyklary institutynda bu ýokary okuw mekdebiniň Žurnalistikanyň nazaryýeti we amalyýeti kafedrasynyň gurnamagynda ýurdumyzyň döredijilik işgärleri bilen duşuşyk geçirildi.
Duşuşyga Türkmenistanyň Halk ýazyjysy, Türkmenistanyň il ýaşulusy, şahyr Orazguly Annaýew, Türkmenistanyň Beýik Saparmyrat Türkmenbaşy adyndaky baş akademiki drama teatrynyň artisti, «Miras» radioýaýlymynyň alypbaryjysy Batyr Çaryýew, «Altyn asyr: Türkmenistan» teleýaýlymynyň gepleşikleri gurnaýjysy we taýýarlaýjysy, žurnalist Nowruz Güýjow dagy gatnaşdy. Dabaranyň dowamynda çykyş edenler döwrümiziň beýik ösüşleri, hormatly Prezidentimiziň alyp barýan parasatly içeri we daşary syýasaty dogrusynda giňişleýin gürrüň etdiler. Duşuşygyň barşynda talyplar myhmanlara özlerini gyzyklandyrýan sowallary berdiler. Döredijilik duşuşygynyň ahyrynda Orazguly Annaýewiň, Nowruz Güýjowyň goşgulary artist Batyr Çaryýew tarapyndan täsirli okaldy. Duşuşyk geljekki halkaraçy žurnalistlerde ýakymly täsirleri galdyrdy. Dabaranyň ahyrynda myhmanlar bilen ýadygärlik surata düşürildi.
Bägül KAKALYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 2-nji ýyl talyby.