«SPORT — PARAHATÇYLYGYŇ ILÇISI» ATLY SPORT BÄSLEŞIGI GEÇIRILDI
2025-nji ýylyň 2-nji iýunynda Türkmenistanyň Daşary işler ministrliginiň Halkara gatnaşyklary institutynda Bütindünýä welosiped güni mynasybetli institutyň «Parahatçylyk medeniýeti» atly ÝUNESKO klubunyň guramagynda talyp ýaşlaryň arasynda «Sport — parahatçylygyň ilçisi» atly sport ýaryşy geçirildi.
Mälim bolşy ýaly, Türkmenistanyň başlangyjy bilen 3-nji iýunyň «Bütindünýä welosiped güni» diýlip yglan edilmegi, Birleşen Milletler Guramasynyň Baş Assambleýasynyň 76-njy sessiýasynyň 61-nji plenar mejlisinde «Durnukly ösüşi gazanmak üçin köpçülikleýin welosiped sürmegi jemgyýetçilik ulag ulgamlaryna girizmek» atly Kararnamanyň biragyzdan kabul edilmegi ýurdumyzda sporty ösdürmek boýunça durmuşa geçirilýän işleriň halkara jemgyýetçiligiň ykrarnamasyna eýe bolýandygyny görkezýär. Türkmenistanyň 2023 — 2027-nji ýyllar üçin ÝUNESKO-nyň Bedenterbiýe we sport boýunça hökümetara komitetiniň agzalygyna biragyzdan saýlanmagy bolsa ýurdumyzyň dünýäde sagdyn durmuş ýörelgelerini wagyz etmäge goşýan saldamly goşandyny aýdyň görkezýär. Şunda türgenleşikleri we ýaryşlary geçirmek hem-de Olimpiýa oýunlaryna gatnaşjak türgenleriň täze neslini kemala getirmek üçin ähli zerur şertler göz öňünde tutulandyr.
Şunuň bilen baglylykda, türkmen diplomatiýasynyň milli mekdebinde sportuň dürli görnüşleri boýunça guralan ýaryşlar ýokary ruhubelentlige beslendi. Munuň özi ýurdumyzda sporty ösdürmek, sport diplomatiýasyny ilerletmek, ýaş nesilleri köpçülikleýin bedenterbiýe hereketlerine höweslendirmek babatdaky asylly ýörelgeleriň täze taryhy döwrümizde mynasyp dowam etdirilýändiginiň nobatdaky aýdyň beýanyna öwrüldi.
Mahym NARMYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.