“Sagdyn ojak – sagdyn jemgyýet” atly wagyz-nesihat çäresi geçirildi
2022-nji ýylyň 27-nji aprelinde Türkmenistanyň Daşary işler ministrliginiň Halkara gatnaşyklary institutynda “Sagdyn ojak – sagdyn jemgyýet” atly wagyz-nesihat çäresi geçirildi. Türkmenistanyň Bilim ministrliginiň wagyz-nesihat we terbiýeçilik işiniň meýilnamasyna laýyklykda guralan bu çärä institutyň professor-mugallymlary we talyp gelin-gyzlary gatnaşdylar.
Wagyz-nesihat çäresinde Türkmenistanyň Daşary işler ministrliginiň Halkara gatnaşyklary institutynyň okuw işleri boýunça prorektory Gülşat Ýusupowa, Aşgabat şäherindäki №1 kömekçi mekdebiň mugallymy Ogulgerek Annasaparowa, Myrat Garryýew adyndaky Döwlet lukmançylyk uniwersitetiniň deri keselleri kafedrasynyň mugallymy, uniwersitetiň ilkinji Zenanlar guramasynyň başlygy Ogulmaýsa Kakabaýewa, Halkara gatnaşyklary institutynyň uly mugallymy, institutyň ilkinji Zenanlar guramasynyň başlygy Almanar Ýazberdiýewa we beýlekiler çykyş edip, Berkarar döwletiň täze galkynyş eýýamy döwründe talyp gyzlary watansöýüjilik, milli mirasymyza hormat goýmak, zähmeti söýmek, maşgala mukaddesligi, arassa ahlaklylyk ruhunda terbiýelemegiň täze many-mazmuna eýe bolýandygyny nygtadylar. Olaryň aýtmagyna görä, häzirki zaman türkmen jemgyýetinde milli ruhda terbiýelenen ýaşlary kemala getirmegiň, olary giň dünýägaraýyşly, sagdyn durmuş ýörelgelerine eýerýän ruhubelent şahsyýetler bolup ýetişdirmegiň uly ähmiýeti bardyr.
Wagyz-nesihat çäresiniň ahyrynda oňa gatnaşyjylar Garaşsyz Watanymyzy ösüşiň täze belentliklerine tarap alyp barmakda, sagdyn jemgyýeti kemala getirmekde amala aşyrýan toplumlaýyn işleri üçin hormatly Prezidentimize hoşallyk sözlerini aýtdylar.
Nowruz KURBANOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.