“PARAHATÇYLYK BILIMINIŇ YLMY” ATLY HALKARA MASLAHATY
2025-nji ýylyň 10-njy noýabrynda Ählumumy Parahatçylyk Bilim Torunyň (Global Peace Education Network (GPEN)) guramagynda dünýäniň dürli künjeginden ýokary wezipeli diplomatlaryň, halkara syýasatçylaryň, bilim ulgamynyň ýolbaşçylarynyň, ýaşlar guramalaryndan wekilleriň hem-de medeniýet we sungat işgärleriniň gatnaşmagynda “The Science of Peace Education” atly halkara maslahaty geçirildi. Bu maslahat çalt depginler bilen ösýän häzirki zaman dünýäsiniň özgerýän we ählumumylaşýan şertlerinde parahatçylygyň many-mazmunyny, onuň ösüp barýan döwletiň milli strategiýalaryndaky ähmiýetini, şeýle hem ösüşiň, ylmyň, diplomatiýanyň we jemgyýetçilik gatnaşyklarynyň möhüm ugruna öwrülen parahat we döredijilikli ýaşamak medeniýetini ösdürmegiň ylmy-pedagogiki esaslaryny ara alyp maslahatlaşmak üçin giň meýdança öwrüldi.
“Taking Peace to Heart”, “Going Far Together”, “Securing Life”, “Arcing Toward Justice” we “Youth Leadership & Celebrating Peace” atly bäş ugurly bölümçede geçirilen halkara maslahatyň esasy çykyşlarynda BMG-niň Baş sekretary Antonio Guterreş we halkara hünärmenler parahatçylygy berkitmegiň ähmiýetini nygtadylar. Şeýle hem bu maslahatyň dowamynda dünýäniň dürli künjeginden gatnaşan alymlaryň, professorlaryň, diplomatlaryň, halkara guramalaryň ýolbaşçylarynyň we ýaş liderleriň bilim arkaly parahatçylygy berkitmek boýunça ylmy taýdan esaslandyrylan tejribelerini paýlaşdylar. Olar halkara hyzmatdaşlygy berkitmek üçin täze taslamalary bilelikde durmuşa geçirmek babatynda tekliplerini berdiler, şeýle-de ýaşlaryň we jemgyýetiň düşünjesinde parahatçylyk medeniýetiniň binýadyny kemala getirmek ugrunda çykyş etdiler.
Maslahatyň ahyrynda aýdym-sazly döredijilik çykyşlary bilen medeni diplomatiýanyň halklary birleşdirýändigi, ruhy goldawy döredýändigi hem-de halklaryň arasynda ynamy berkidýändigi görkezildi.
Aýgözel ÖWEZOWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň uly mugallymy.