KATAR DÖWLETINIŇ DIM-NIŇ DIPLOMATIÝA INSTITUTYNYŇ DIREKTORY BILEN GEÇIRILEN DUŞUŞYK
2025-nji ýylyň 13-nji maýynda Türkmenistanyň Daşary işler ministrliginiň Halkara gatnaşyklary institutynda bu ýokary okuw mekdebiniň rektory G.Ýusupowa bilen “Türkmenistanyň daşary syýasaty we diplomatiýasy: parahatçylygyň, howpsuzlygyň we durnukly ösüşiň hatyrasyna hyzmatdaşlyk” atly halkara ylmy-amaly maslahata gatnaşmak üçin Türkmenistanda saparda bolýan Katar döwletiniň Daşary işler ministrliginiň Diplomatiýa institutynyň direktory Mohamed al-Horryň arasynda duşuşyk geçirildi.
Duşuşygyň başynda Türkmenistan bilen Katar döwletiniň arasyndaky ikitaraplaýyn hyzmatdaşlygyň ileri tutulýan ugurlary, hususan-da, ylym-bilim ulgamynda alnyp barylýan hyzmatdaşlyk barada gürrüň edildi. Mundan başga-da, taraplar Türkmenistanyň Daşary işler ministrliginiň Halkara gatnaşyklary instituty we Katar döwletiniň Daşary işler ministrliginiň Diplomatiýa institutynyň arasyndaky hyzmatdaşlygy has-da ösdürmek babatda birnäçe teklipleri ara alyp maslahatlaşdylar.
Duşuşygyň ahyrynda taraplar ikitaraplaýyn hyzmatdaşlygy mundan beýläk hem ösdürmek maksady bilen, “2025-nji ýyl üçin Türkmenistanyň Daşary işler ministrliginiň Halkara gatnaşyklary instituty bilen Katar döwletiniň Daşary işler ministrliginiň Diplomatiýa institutynyň arasynda gol çekilen Özara düşünişmek hakyndaky Ähtnamanyň ýerine ýetirilişi boýunça Ýol Kartasyna” gol çekdiler.
Şeýle duşuşyklaryň yzygiderli guralmagy ikitaraplaýyn gatnaşyklary pugtalandyrmakda, esasan hem ylym-bilim ulgamyny has-da ösdürmekde, özara tejribeleri paýlaşmakda uly mümkinçilikleri döredýär.
Şasenem MEÝLISOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.