“Jepasyny çeken, wepasyny görer” atly wagyz-nesihat duşuşygy
Türkmenistanyň Daşary işler ministrliginiň Halkara gatnaşyklary institutynda 2021-njy ýylyň 24-nji fewralynda hukuk kadalarynyň düzgünleriniň berjaý edilmegi, şeýle hem zyýanly endiklerden gaça durmagy we sagdyn durmuş ýörelgelerine eýermegi wagyz-nesihat etmek maksady bilen Aşgabat şäheriniň Berkararlyk etrap häkimliginiň, Aşgabat şäheriniň Berkararlyk etrap Kazyýetiniň, Türkmenistanyň Saglygy goraýyş we derman senagaty ministrliginiň Saglygy goraýyş habarlar merkeziniň wekilleriniň gatnaşmagynda talyp ýaşlaryň arasynda “Jepasyny çeken, wepasyny görer” atly wagyz-nesihat duşuşygy geçirildi. Duşuşygyň barşynda myhmanlar türkmen halkyna mahsus bolan halallyk, zähmetsöýerlik, ynsaplylyk ýaly ýörelgeleriň ata-babalarymyzdan bize galan mirasdygyny, şol ýörelgelere eýerip ýaşamak her bir türkmen nesliniň borjudygy barada durup geçmek bilen, durmuşdan alnan mysallar arkaly giňişleýin belläp geçdiler.
“Arassaçylyk” diýen düşünje hem örän giň bolup, ol bedeniň, pikiriň, ruhy dünýäň, wyždanyň, zähmetiň arassalygyny öz içinde jemleýär. Şonuň üçin, arassaçylyk kadalaryny dogry we dürs berjaý etmek, halal zähmet çekmek – türkmeniň ata-baba ýörelgeleriniň iň naýbaşysydygyny ösüp gelýän ýaş nesle düşündirmek her birimiziň borjumyzdyr. Duşuşygyň ahyrynda, şular ýaly wagyz-nesihat çäreleriniň her bir adama edýän oňyn täsiri barada aýratyn bellenilip, hormatly Prezidentimize okamaga, öwrenmäge döredip berýän mümkinçilikleri üçin alkyş sözleri aýdyldy.
Mähri BÄŞIMOWA,
Türkmenistanyň Daşary işler ministrliginiň
Halkara gatnaşyklary institutynyň mugallymy
ilkinji Zenanlar guramasynyň işjeň agzasy