HYZMATDAŞLYGYŇ TÄZE GADAMLARY
2022-nji ýylyň 13-nji aprelinde Türkmenistanyň Daşary işler ministrliginiň Halkara gatnaşyklary institutyndaky Strategik barlaglar boýunça ylmy merkez bilen Azerbaýjan Respublikasynyň Diplomatik akademiýasynyň ösüş we diplomatiýa institutynyň arasynda göni wideoaragatnaşyk arkaly tanyşlyk duşuşygy geçirildi. Oňa degişli ýokary okuw mekdepleriniň wekilleri gatnaşdylar.
Duşuşykda ylmy merkeziň başlygy Şiri Şiriýew Türkmenistanyň Daşary işler ministrliginiň Halkara gatnaşyklary institutynda täze açylan ylmy merkeziň öňünde durýan maksatlar we wezipeler barada giňişleýin gürrüň berdi. Strategik barlaglar boýunça ylmy merkeziň ylmy işgäri Allaberdi Nyýazow öz çykyşynda geljekde sebitiň ýurtlarynyň ugurdaş merkezleri bilen hyzmatdaşlyk gatnaşyklaryny ýola goýmagyň merkeziň esasy wezipeleriniň biri bolup durýandygyny belledi.
Azerbaýjan Respublikasynyň Diplomatik akademiýasynyň ösüş we diplomatiýa institutynyň programmalar boýunça direktory Nargiz Ismailowa institutyň düzüminde döredilen täze departamentler we olaryň ýerine ýetirýän işleriniň üstünde durup geçdi.
Taraplar geljekde iki ýurduň ylmy merkezleriniň gatnaşyklaryny işjeňleşdirmek boýunça degişli hyzmatdaşlyk ylalaşygyna gol çekilmeginiň zerurlygy, özlerini gyzyklandyrýan meseleler barada birnäçe tegelek stol maslahatlarynyň geçirilmeginiň uly ähmiýete eýedigi barada pikir alyşdylar.
Aýlar ATAJYKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.