Hormatly Prezidentimiziň «Abadançylygyň röwşen gadamlary» atly täze kitabynyň tanyşdyrylyş dabarasy
2022-nji ýylyň 19-njy fewralynda Türkmenistanyň Daşary işler ministrliginiň guramagynda Halkara gatnaşyklary institutynda hormatly Prezidentimiziň «Abadançylygyň röwşen gadamlary» atly täze kitabynyň tanyşdyrylyş dabarasy geçirildi. Täze kitabyň tanyşdyrylyş dabarasyna Türkmenistanyň Daşary işler ministrliginiň wekilleri, Türkmenistanyň Daşary işler ministrliginiň Halkara gatnaşyklary institutynyň we ýurdumyzyň beýleki ýokary okuw mekdepleriniň professor-mugallymlary we talyp ýaşlary, şeýle hem ýurdumyzyň habar beriş serişdeleriniň wekilleri gatnaşdylar.
Dabaranyň dowamynda hormatly Prezidentimiziň Türkmenistanyň diplomatik işgärleriniň güni mynasybetli halkymyza peşgeş beren täze eseriniň many-mazmuny, ylmy we terbiýeçilik ähmiýeti dogrusynda giňişleýin beýan edildi.
Hormatly Prezidentimiziň 2021-nji ýylyň dowamynda — 2022-nji ýylyň başynda ýurdumyzyň durmuşyndaky, şeýle-de halkara derejeli möhüm wakalar, taryhy seneler mynasybetli sözlän sözlerini, daşary ýurtlaryň habar beriş serişdeleriniň sowallaryna beren jogaplaryny özünde jemleýän «Abadançylygyň röwşen gadamlary» atly täze kitabynyň türkmen halkyna sowgat berilmegi giň okyjylar köpçüliginiň, esasanam türkmen diplomatlarynyň kalbyny egsilmez buýsanja besleýär.
Tanyşdyrylyş dabarasynyň ahyrynda oňa gatnaşyjylar berkarar Watanymyzyň abraýyny Ýer ýüzünde belentden belende galdyrýan Gahryman Arkadagymyza belent başynyň aman, ömrüniň uzak, il-ýurt bähbitli, döwlet ähmiýetli işleriniň rowaçlyklara beslenmegini, galamynyň ýiti bolmagyny tüýs ýürekden arzuw etdiler.
Şeýle hem bu barada şu ýerde okap bilersiňiz :
Türkmenistanyň Daşary işler ministrliginiň
Halkara gatnaşyklary institutynyň mugallymy.