GERMANIÝADA GAZANYLAN AKADEMIKI WE MEDENI TEJRIBE
Häzirki zaman dünýäsinde ýaşlaryň halkara ylym-bilim giňişligine aralaşmagy, daşary ýurt dillerini kämil özleşdirmegi we medeniýetara dostluk köprülerini gurmagy uly ähmiýete eýedir. Türkmenistanyň Daşary işler ministrliginiň Halkara gatnaşyklary institutynyň talyby hökmünde, meşhur Nemes akademik alyş-çalyş gullugynyň (DAAD) „Hochschulsommerkurse“ maksatnamasynyň ýeňijisi bolup, Germaniýa Federatiw Respublikasynyň Bonn şäherindäki Goethe-Institutynda B2 derejesi boýunça çuňlaşdyrylan tomusky nemes dili amaly okuwlaryna gatnaşmak bagty maňa hem nesip etdi. Bu halkara taslama dünýäniň dürli künjeklerinden gelen ýaşlary bir ýere jemläp, dil başarnyklaryny akademiki we diplomatiki derejede ösdürmäge uly mümkinçilik açdy.
Bir aýa çekýän intensiw okuw tapgyrynda diňe bir adaty gepleşik dilini öwrenmek bilen çäklenilmän, eýsem akademiki ýazuw medeniýeti, pikirleriňi yzygiderli hem-de çuňňur beýan etmek ýaly möhüm ugurlara uly üns berildi. Tejribeli nemes mugallymlarynyň ýolbaşçylygynda geçen sapaklarda Germaniýanyň jemgyýetçilik-syýasy gurluşy, ykdysady üstünlikleri, medeni mirasy we halkara gatnaşyklaryndaky eýeleýän orny barada giňişleýin öwrenildi. Okuwlaryň doly nemes dili gurşawynda geçirilmegi öwreniş amalyýetiniň örän tebigy, çalt we netijeli bolmagyny üpjün etdi.
Sapaklardan daşary guralan medeni we köpçülikleýin çäreler hem maksatnamanyň mazmunyny has-da baýlaşdyrdy. Şäheriň taryhy ýerlerine, muzeýlerine hem-de medeni merkezlerine guralan gezelençler nemes halkynyň gündelik durmuşy we baý taryhy bilen ýakyndan tanyşmaga mümkinçilik döretdi. Dünýäniň onlarça döwletinden gelen geljekki hünärmenler bilen bir gurşawda okap, gürrüňdeş bolmak, halkara derejesinde dostluk köprülerinin̈ binýadyny goýdy we dünýägaraýşymyzy giňeltdi.
Bonn şäherinde gazanylan bu uly amaly tejribe geljekki hünär we ylmy ýolumyzda möhüm basgançak bolar. Ýaşlaryň dünýä derejesinde bilim almagy, kämilleşmegi we halkara giňişliginde ukyp-başarnygyny görkezmegi üçin döredilýän giň mümkinçilikler ýurdumyzyň bilim ulgamynyň abraýynyň barha ýokarlanýandygynyň aýdyň subutnamasydyr.
Aýnur DOWLETÝAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 3-nji ýyl talyby