Garaşsyz Döwletleriň Arkalaşygynyň göreldeli ýaş alymy
Türkmenistanyň Daşary işler ministrliginiň Halkara gatnaşyklary institutynyň talyby Serdar Rahymow “GDA-nyň göreldeli ýaş alymy 2022” taslamasynyň ýeňijisi boldy.
Bu çäre “BOBEK” birleşiginiň milli hereketi görnüşindäki hukuk guramalary birleşiginiň goldawy bilen Halkara alymlar birleşigi tarapyndan gurnaldy. Taslama Azerbaýjandan, Russiýa Federasiýasyndan, Belarus Respublikasyndan, Gazagystandan, Özbegistan Respublikasyndan, Täjigistandan, Türkmenistandan, Gyrgyzystan Respublikasyndan dürli ugurlardaky meseleler boýunça ylmy ösüşlere höwesli zehinli ýaşlar gatnaşdylar.
Serdar Rahymowyň “Sebit howpsuzlygyny üpjün etmekde öňüni alyş diplomatiýasynyň orny, Türkmenistanyň sebit we global meseleleri çözmekde oňyn tejribesi” atly ylmy işine emin agzalary tarapyndan ýokary baha berildi we II derejeli diplom we döş nyşany bilen sylaglandy. Ýeri gelende aýtsak, Serdar Rahymow Türkmenistanyň ýaşlarynyň arasynda geçirilen ylmy işleri boýunça bäsleşiginiň ýeňijisi hem bolupdy.
Garaşsyz Döwletleriň Arkalaşygyna girýän ýurtlaryň VI halkara kitap neşiri “GDA-nyň göreldeli ýaş alymy 2022” GDA-nyň ýaş alymlarynyň ylmy we şahsy üstünliklerini wagyz etmeklige gönükdirilen özboluşly taslama. Bu taslamanyň esasy maksady, ýaş alymlaryň iň oňat we innowasiýa eserlerini kesgitlemek, ylmy gyzyklanmalary öňe sürmek we ylmyň ösmegi üçin umumy birleşdiriji platforma döretmekdir.
Hudaýberdi ROZYKOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby