Fransuz we nemes dilleriniň güni mynasybetli dil hepdeligi
Türkmenistanyň Prezidentiniň 2017-nji ýylyň 22-nji dekabrynda tassyklan “Türkmenistanda daşary ýurt dillerini okatmagy kämilleşdirmegiň Konsepsiýasyny” ýurdumyzda üstünlikli durmuşa geçirmek maksady bilen, şeýle hem fransuz we nemes dilleriniň güni mynasybetli 2023-nji ýylyň 17-20-nji apreli aralygynda Türkmenistanyň Daşary işler ministrliginiň Halkara gatnaşyklary institutynyň Dünýä dilleri kafedrasynyň guramagynda dil hepdeligi geçirildi.
Hepdeligiň dowamynda talyplar diwar gazetleriniň, okuw kitaplarynyň, sözlükleriň sergisini gurnadylar. Şeýle-de talyplar Fransiýanyň we Germaniýanyň bilim ulgamyny, ykdysady ösüşini, taryhyny, edebiýatyny we sungatyny, gözel ýerlerini wasp edýän prezentasiýalar we çeper okaýyşlar bilen çykyş etdiler.
Hepdeligiň dowamynda Dünýä dilleri kafedrasynyň fransuz we nemes dili mugallymlarynyň görkezme sapaklary geçirildi. Institutyň fransuz we nemes dillerini öwrenýän talyplarynyň arasynda zehin bäsleşikleri geçirildi we bäsleşiklerde talyplar söz düzmek, diktant ýazmak we zehin soraglaryna jogap bermek boýunça özara ýaryşdylar, şol ýurtlaryň taryhy barada sorag-jogap alyşdylar. Bäsleşikleriň ahyrynda Dünýä dilleri kafedrasynyň mugallymlarynyň eminlik etmeginde talyplara adalatly baha berildi.
Hepdeligiň ahyrynda oňa gatnaşyjylar talyplara, ýaşlara daşary ýurt dillerini kämil derejede öwrenmek, ony okuwdan daşary geçirilýän işler bilen utgaşdyrmak boýunça döredilýän ähli mümkinçilikler, şertler üçin Gahryman Arkadagymyza, hormatly Prezidentimize alkyş sözlerini aýtdylar.
Meňli HOJAMUHAMMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.