“Erasmus+” maksatnamasy bilen tanyşdyrylyş çäresi geçirildi
2022-nji ýylyň 16-njy dekabrynda Türkmenistanyň Daşary işler ministrliginiň Halkara gatnaşyklary institutynda Ýewropa Bileleşiginiň “Erasmus+” maksatnamasy bilen tanyşdyrylyş çäresi geçirildi. Oňa “Erasmus+” maksatnamasynyň Türkmenistandaky utgaşdyryjysy Aýna Çörekliýewa we institutymyzyň mugallymlar we talyp ýaşlary gatnaşdylar.
Çäräniň dowamynda A.Çörekliýewa “Erasmus+” maksatnamasynyň 2021–2027-nji ýyllar üçin niýetlenen okuw maksatnamalary hakynda giňişleýin gürrüň berdi. Mundan başga-da, A.Çörekliýewa geljekki “Erasmus+2023” maksatnamasyna gatnaşmagyň şertleri bilen jikme-jik tanyşdyrdy. Magistrantlar üçin niýetlenen “Erasmus Mundus” we Ýewropa Bileleşiginiň öňdebaryjy tejribesini öwrenmäge niýetlenen “Jean Monnet” maksatnamalary barada aýtdy.
Çäräniň ahyrynda institutymyzyň mugallymlary we talyplary özlerini gyzyklandyrýan soraglary berip, anyk we giňişleýin jogaplary aldylar.
Ýewropa Bileleşiginiň maksatnamasy bilim ulgamynda, ýaş hünärmenleri taýýarlamakda Ýewropada we halkara hyzmatdaşlygynda 20 ýyldan gowrak tejribe gazanan üstünliklere esaslanýar. Ýewropa Bileleşiginiň “Erasmus+” okuw maksatnamasy, bilimiň dürli ugurlarynda özara gatnaşyklary ösdürmegi, zähmet bazaryna gatnaşyjylary çekmegi, täze pikirleri we hyzmatdaşlygyň görnüşlerini höweslendirmegi maksat edinýär.
Rahym AKMURADOW,
Türkmenistanyň Daşary işler ministrliginiň
Halkara gatnaşyklary we diplomatiýa
kafedrasynyň öwreniji mugallymy.