Daşky gurşawy goramak babatda alnyp barylýan işler
2023-nji ýylyñ 18-nji oktýabrynda Türkmenistanyň Daşary işler ministrliginiň Halkara gatnaşyklary institutynda Türkmenistan bilen BMG-niň daşky gurşaw boýunça maksatnamasynyň (UNEP-iñ) arasyndaky daşky gurşaw baradaky hyzmatdaşlygy maslahatlaşmak babatda okuw sapagy geçirildi. Oña Türkmenistanyň Daşary işler ministrliginiň, Daşky gurşawy goramak, Oba hojalyk ministrlikleriniñ, Hazar deñzi institutynyñ, Çöller, ösümlik we haýwanat dünýäsi milli institutynyñ, Türkmenistanyň Daşary işler ministrliginiň Halkara gatnaşyklary institutynyň, Arkadag şäher häkimliginiñ wekilleri gatnaşdylar.
Häzirki wagtda Türkmenistanda daşky gurşawy goramak ugrunda milli strategiýanyň üstünlikli amala aşyrylmagy Milletler Bileleşiginiň Durnukly ösüş maksatlaryna we dünýäniň ekoulgamyny goramak boýunça öňde durýan möhüm wezipelerine doly laýyk gelýär. Şunuň bilen baglylykda, BMG-niň biologik köpdürlülik, çölleşmä garşy göreşmek, howanyň üýtgemegi, ozon gatlagyny goramak, serhetüsti suw akymlaryny we halkara kölleri goramak hem-de peýdalanmak, ÝUNESKO-nyň Bütindünýä medeni we tebigy mirasy goramak hakynda resminamalarynyň ýurdumyz tarapyndan tassyklanmagy munuň aýdyň subutnamasydyr. Şeýle-de Türkmenistan Hazar deňziniň deňiz gurşawyny goramak hakynda Çarçuwaly konwensiýasy we suw-batgalyk ýerler hakynda Ramsar konwensiýasy, BMG-niň Ösüş maksatnamasy, BMG-niň Daşky gurşaw boýunça maksatnamasy, Ählumumy ekologiýa gaznasy bilen bilelikde durmuşa geçirilýän beýleki onlarça taslamany tassyklady.
Bu taslama Aşgabatda Merkezi Aziýada howanyň üýtgemegi bilen baglanyşykly tehnologiýalar boýunça sebit merkezini döretmek, BMG-niň Suw strategiýasyny we Aral deňziniň sebiti boýunça Ýörite maksatnamasyny işläp taýýarlamak, BMG-niň Aral meselesiniň aýry-aýry ugurlaryny ýüze çykarmak, Hazar deňziniň ekologik abadançylygyny üpjün etmek ýaly tekliplerden ybaratdyr.
Mekan SALYHOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň II ýyl talyby.