ÇEKELEŞIKLI BÄSLEŞIK WE YLMY-SEMINAR GEÇIRILDI
2024-nji ýylyň 1-nji maýynda Türkmenistanyň Daşary işler ministrliginiň Halkara gatnaşyklary institutynda Jemgyýeti öwreniş ylymlary kafedrasynyň «Paýhas we parasat» ylmy gurnagy bilen Žurnalistikanyň nazaryýeti we amalyýeti kafedrasynyň “Ýaş žurnalistler” ylmy-döredijilik gurnagynyň bilelikde gurnamagynda hormatly Prezidentimiziň “Änew – müňýyllyklardan gözbaş alýan medeniýet” atly kitabynyň many-mazmunyny çuňňur öwrenmek maksady bilen, 1-nji ýyl talyplarynyň arasynda yglan edilen “Hormatly Prezidentimiziň “Änew – müňýyllyklardan gözbaş alýan medeniýet” atly kitaby geçmişi we şu güni birleşdirýän köprüdir” atly bäsleşigi we ylmy-seminary geçirildi. Bäsleşige institutyň fakultetlerinden gurnaklaryň işjeň agzalary gatnaşdylar. Ylmy-seminaryň dowamynda talyplar hormatly Prezidentimiziň täze kitabynyň ähmiýetini ylmy esasda düşündirdiler.
Şeýle-de institutyň fakultetleri boýunça dört topar özaralarynda bäsleşdiler. Toparlar hormatly Prezidentimiziň täze kitabynyň bölümleri boýunça prezentasiýa bilen çykyş etmek, ýörite taýýarlanan soraglara jogap bermek, kroswordlaryň jogaplaryny bilmek, kitapda Magtymguly Pyragynyň döredijiliginiň aýratynlyklary baradaky sowallara jogap bermek ýaly bäsleşigiň şertleri boýunça ýaryşdylar. Çekeleşikli geçen bäsleşigiň jemleri boýunça Halkara žurnalistikasy fakultetiniň 1-nji ýyl talyplaryndan düzülen topar I orna, Halkara ykdysady gatnaşyklary fakultetiniň 1-nji ýyl talyplaryndan düzülen topar II orna mynasyp boldular.
Şeýle-de hormatly Prezidentimiziň “Änew – müňýyllyklardan gözbaş alýan medeniýet” atly kitabyndan taýýarlanan soraglara çalt hem dogry jogap bermek boýunça talyplaryň ýekebara gatnaşmaklarynda geçirilen bäsleşikde bolsa Halkara gatnaşyklary fakultetiniň 1-nji ýyl talyby Sahydöwlet Hümmetjumaýew I orna, Halkara žurnalistikasy fakultetiniň 1-nji ýyl talyby Yhlas Hallyýew II orna mynasyp boldular.
Bäsleşigiň ahyrynda ýeňijiler işjeň gatnaşandyklary hem-de döredijilik ukyp-başarnygyny görkezendikleri üçin institutyň Hormat hatlary we sowgatlar bilen sylaglandylar.
Gülüstan JOMARTOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.