BIRLEŞEN MILLETLER GURAMASYNYŇ GÜNÜNE BAGYŞLANAN WIDEOARAGATNAŞYK ARKALY MASLAHAT
2023-nji ýylyň 24-nji oktýabrynda Aba Annaýew adyndaky Halkara atçylyk akademiýasynyň "Ahalteke atlary – parahatçylygyň ilçileri" ÝUNESKO klubynyň guramagynda Birleşen Milletler guramasynyň güni mynasybetli wideoaragatnaşyk arkaly maslahat geçirildi.
Maslahata ýurdumyzyň ýokary okuw mekdeplerinde hereket edýän ÝUNESKO klublary we kafedralary, şol sanda Türkmenistanyň Daşary işler ministrliginiň Halkara gatnaşyklary institutynyň binýadynda döredilen “Parahatçylyk medeniýeti” atly ÝUNESKO klubynyň agzalary hem gatnaşdylar. Maslahatyň dowamynda çykyş edenler Türkmenistanyň Birleşen Milletler Guramasy we ÝUNESKO bilen hyzmatdaşlygynyň parahatçylygy we durnuklylygy gazanmakda aýratyn ähmiýeti barada gürrüň berdiler. Institutymyzyň Halkara gatnaşyklary we diplomatiýa kafedrasynyň mugallymy Aýgözel Aşyrowa hem maslahatda çykyş edip, “Parahatçylyk medeniýeti” klubynyň maksady, ýerine ýetirýän işleri dogrusynda belläp geçdi.
Gülşirin KADYROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.