Aýdym-sazly baýramçylyk dabarasy geçirildi
2022-nji ýylyň 6-njy dekabrynda Türkmenistanyň Daşary işler ministrliginiň Halkara gatnaşyklary institutynda, Türkmenistanyň Kärdeşler arkalaşyklarynyň Milli merkeziniň hem-de Türkmenistanyň Döwlet, hukuk we demokratiýa institutynyň guramagynda Türkmenistanyň hemişelik Bitaraplygynyň 27 ýyllygy we Adam hukuklarynyň halkara güni mynasybetli “Türkmenistanyň hemişelik Bitaraplygy: döredijilikli zähmetiň we adam hukuklarynyň durmuşa geçirilişiniň ýörelgeleri” atly aýdym-sazly baýramçylyk dabarasy geçirildi.
Bu aýdym-sazly baýramçylyk dabarasyna Türkmenistanyň Milli Geňeşiniň agzalary, Türkmenistanyň Kärdeşler arkalaşyklarynyň, Türkmenistanyň Döwlet, hukuk we demokratiýa institutynyň wekilleri şeýle hem Türkmenistanyň Daşary işler ministrliginiň Halkara gatnaşyklary institutynyň professor-mugallymlary we talyp ýaşlary gatnaşdylar. Baýramçylyk dabarasynda Türkmenistanyň Daşary işler ministrliginiň Halkara gatnaşyklary institutynyň rektory Jumamyrat Gurbangeldiýew, Türkmenistanyň Milli Geňeşiniň Halk maslahatynyň Halkara meseleleri baradaky komitetiniň agzasy Enejan Ataýewa, Türkmenistanyň Milli Geňeşiniň Mejlisiniň deputaty, Ylym, bilim, medeniýet we ýaşlar syýasaty baradaky komitetiniň agzasy Baýmyrat Babaýew, Türkmenistanyň Kärdeşler arkalaşyklarynyň Milli merkeziniň we Zenanlar birleşiginiň Merkezi Geňeşiniň başlygy Akjemal Durdyýewa we Türkmenistanyň Döwlet, hukuk we demokratiýa institutynyň direktory Ýagmyr Nuryýew çykyş etdiler. Şeýle-de baýramçylyk dabarasynda Türkmenistanyň Daşary işler ministrliginiň Halkara gatnaşyklary institutynyň talyp ýaşlaryndan düzülen aýdym-saz toparynyň çykyşlaryna tomaşa edildi.
Baýramçylyk dabarasynda çykyş edenler hormatly Prezidentimiziň alyp barýan içeri syýasatynyň we hemişelik Bitaraplyk ýörelgämize daýanýan daşary syýasatymyzyň sazlaşmagynda milli ösüşlerimiziň halkara derejesinde nusgalyk ösüşlere öwrülýändigini, halkymyzyň durmuş, hal-ýagdaýyny barha ýokarlandyryp, berkararlyk binýadymyzy has-da berkidýändigini nygtap geçdiler.
Şeýle hem baýramçylyk dabarasynyň çäginde Türkmenistanyň Kärdeşler arkalaşyklarynyň Milli merkezi bilen Türkmenistanyň Döwlet, hukuk we demokratiýa institutynyň “Demokratiýa we hukuk” žurnalynda yglan eden “Döredijilikli zähmet we adam hukuklary” atly ylmy-amaly makala bäsleşiginiň ýeňijileri yglan edildi. Bäsleşikde birinji orna Türkmenistanyň Daşary işler ministrliginiň Halkara gatnaşyklary institutynyň Halkara hukugy we deňeşdirme hukuk öwreniş kafedrasynyň uly mugallymy Dürli Ballyýewa, ikinji orna Türkmenistanyň Içeri işler ministrliginiň institutynyň Jenaýat-hukuk dersleri kafedrasynyň mugallymy Döwran Karajaýewe, üçünji orna Magtymguly adyndaky Türkmen döwlet uniwersitetiniň Raýat hukugy kafedrasynyň aspiranty Mähri Synykowa eýe bolup, olara hormat hatlary hem-de sowgatlar gowşuryldy.
Baýramçylyk dabarasyna gatnaşyjylar hormatly Prezidentimiziň janynyň sag, ömrüniň uzak, il-ýurt bähbitli, umumadamzat ähmiýetli işleriniň rowaç bolmagyny arzuw etdiler.
Beggeldi GUTLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň
III ýyl talyby.