«AKYLDAR PAÝHASY ÄLEME DOLÝAR» ATLY METBUGAT MASLAHAT GEÇIRILDI
2023-nji ýylyň 10-njy fewralynda Türkmenistanyň Daşary işler ministrliginiň Halkara gatnaşyklary institutynda beýik şahyr Magtymguly Pyragynyň doglan gününiň 300 ýyllygyna bagyşlanan "Akyldar paýhasy dünýäni doldurýar" atly metbugat maslahaty geçirildi.
Maslahata Daşary işler ministrliginiň Halkara gatnaşyklary institutynyň, Magtymguly adyndaky Türkmen döwlet uniwersitetiniň, Halkara Ynsanperwer ylymlary we ösüş uniwersitetiniň, Türkmen döwlet bedenterbiýe we sport institutynyň, şeýle hem Türkmen döwlet medeniýet institutynyň mugallymlary we talyplary gatnaşdylar.
Dabaraly maslahatyň dowamynda çykyş edenler Magtymguly Pyragynyň çuňňur filosofiýa ýugrulan goşgularynyň çeperçilik ähmiýeti dogrusynda belläp geçdiler we Pyragynyň ömrüne we döredijiligine degişli ylmy işleri taýýarlamak we çap etmek, onuň edebi-ruhy mirasyny toplamak maksady bilen, ýurduň welaýatlaryna we daşary ýurtlara ylmy saparlary guramak, degişli halkara guramalar bilen hyzmatdaşlykda şol mirasy dünýä derejesinde öwrenmek we wagyz etmek işlerini ýola goýmak, beýik söz ussadynyň watançylyk we millilik babatyndaky ýörelgelerini ýaşlaryň arasynda wagyz etmek maksady bilen, okuw-usuly, dokumental çeper filmleri döretmek hem-de teleradioýaýlymlarda gepleşikler tapgyryny guramak wezipelerini öňde goýmalydygy we şol wezipeleri üstünlikli berjaý edip, ýubileý ýylyny halkara derejeli, ýokary guramaçylykly dabaralara, medeni çärelere beslenmegine goşant goşmak ähli döwürleriň şahyry hasaplanylýan beýik akyldarymyzyň synmaz ruhunyň öňünde biziň her birimiziň mukaddes borjumyzdygyny nygtadylar.
Beýik akyldar we nusgawy şahyr Magtymguly Pyragy türkmen edebiýatynyň görnükli wekilidir. Köp ýyllaryň geçendigine garamazdan, şu günlere çenli şahyryň goşgulary öz gymmatyny ýitirmeýär. Beýik akyldaryň goşgulary dünýäniň köp dillerine terjime edildi. Geljekki ýyl Magtymguly Pyragynyň doglan gününiň 300 ýyllygy ähli türk döwletleri tarapyndan belleniler.
Bägül MERDANOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.
Şeýle hem bu barada şu ýerden okap bilersiňiz: