TÜRKMEN OBASYNYŇ DÖWREBAP NUSGASY
Halkymyzyň alnyndan ak Gün bolup dogan mukaddes Garaşsyzlygymyzyň 34 ýyllyk şanly baýramynyň öňüsyrasynda Diýarymyzda toýlar toýlara ulaşýar. Ençeme durmuş maksatly desgalar, bilim ojaklary, çagalar baglary, kärhanalar yzygiderli açylyp ulanylmaga berilýär. Bularyň ählisi hem mukaddes Garaşsyzlygymyzyň halkymyza eçilen ak bagtynyň miweleridir. Ýakynda Ahal welaýatynyň Ak bugdaý etrabynyň Öňaldy geňeşliginde täze, döwrebap Döwletli mekan obasynyň dabaraly ýagdaýda açylmagy hem munuň aýdyň subutnamasydyr.
Garaşsyzlyk ýyllarynda ýurdumyzda amala aşyrylýan toplumlaýyn özgertmeleriň netijesinde halkymyzyň durmuş-ykdysady ýagdaýy has-da ýokarlandy. Watanymyzyň oba-şäherleriniň keşbi düýpgöter özgerdi. Berkarar döwletiň täze eýýamynyň Galkynyşy döwründe döwletimiziň ykdysady taýdan kuwwatlanýandygyny aýdyň görkezýän täze, häzirki zaman obalarynyň gurulmagy, türkmen obasynyň täze nusgasynyň döredilmegi oba ilatynyň durmuşynyň hil taýdan täze derejesini kemala getirmäge, halkymyzyň hal-ýagdaýyny yzygiderli gowulandyrmaga gönükdirilendir.
Häzirki wagtda ýurdumyzda oba ilatynyň sanynyň barha artmagy netijesinde, köp sanly täze maşgalalar emele gelýär. Şunuň bilen baglylykda, «Türkmenistanyň Prezidentiniň obalaryň, şäherçeleriň, etraplardaky şäherleriň we etrap merkezleriniň ilatynyň ýaşaýyş-durmuş şertlerini özgertmek boýunça 2028-nji ýyla çenli döwür üçin rejelenen görnüşdäki Milli maksatnamasyna» laýyklykda ýurdumyzyň welaýatlarynda döwrebap durmuş-medeni binalary we desgalary gurmak babatda ägirt uly işler alnyp barylýar. «Watan diňe halky bilen Watandyr! Döwlet diňe halky bilen döwletdir!» diýip, halkymyzyň eşretli, bagtyýar durmuşyň hözirini görüp ýaşamagy üçin ägirt uly işleri durmuşa geçirýän Arkadagly Gahryman Serdarymyzyň taýsyz tagallalary netijesinde gadymy Ahal ýaýlasynda gurlan Döwletli mekan obasynyň açylmagy hem mukaddes Garaşsyzlygymyzyň şanly 34 ýyllyk toýunyň bosagasynda ajaýyp toý sowgadyna öwrüldi. Döwrebap obada ençeme durmuş-medeni maksatly binalaryň, ähli amatlyklar bilen üpjün edilen ýaşaýyş jaýlarynyň gurlup ulanylmaga berilmegi Watanymyzda jemgyýetiň iň gymmatly baýlygy bolan adam hakynda döwlet derejesinde edilýän aladalaryň aýdyň subutnamasy bolup durýar.
Berkarar döwletimiziň gülläp ösmegi, halkymyzyň hal-ýagdaýynyň gowulandyrylmagy ugrunda taýsyz tagallalary edýän Gahryman Arkadagymyzyň, Arkadagly Gahryman Serdarymyzyň janlary sag, belent başlary aman, döwletli ýollary dowamat dowam bolsun!
Yhlas HALLYÝEW,
Türkmenistanyň Daşary işler ministrliginiň
Halkara gatnaşyklary institutynyň talyby, «Esger».
Çeşme: «Esger» gazeti, 11.09.2025ý. https://turkmenmetbugat.gov.tm/tk/newspapers/10/articles/207638