YLYMLAR GÜNI MYNASYBETLI GEÇIRILEN YLMY-AMALY MASLAHAT
2025-nji ýylyň 10-njy iýunynda Türkmenistanyň Daşary işler ministrliginiň Halkara gatnaşyklary institutynda Ylymlar güni mynasybetli «Ählumumy parahatçylygyň we durnukly ösüşiň üpjün edilmeginde ylmy-tehniki hyzmatdaşlygyň orny» atly ylmy-amaly maslahat geçirildi. Oňa türkmen diplomatiýasynyň milli mekdebiniň professor-mugallymlary, talyp ýaşlary we ýurdumyzyň ylmy edaralarynyň wekilleri gatnaşdylar. Maslahatda çykyş edenler ýurdumyzda ylym-bilime berilýän üns, döredilýän mümkinçilikler, onuň halkara gatnaşyklaryndaky orny, türkmen-rus gatnaşyklarynyň taryhy barada giňişleýin gürrüň berdiler. Bu möhüm çäräniň başynda Türkmenistanyň Daşary işler ministrliginiň Halkara gatnaşyklary institutynyň rektory Gülşat Ýusupowa giriş sözi bilen çykyş etdi. Onda ýokary okuw mekdebiniň ýolbaşçysy türkmen halkynyň şöhratly taryhynda ýaşap geçen görnükli alymlar, olaryň bitiren işleri dünýäniň gazananlaryna goşan goşandy dogrusynda belläp geçdi. Soňra bolsa maslahat meýilnama esasynda dowam edip, söz sözlänler öz temalary boýunça myhmanlara gyzykly maglumatlary ýetirdiler. Onuň yzysüre bolsa ylmy-amaly maslahat öz işini «Türkmenistanda halkara ylmy hyzmatdaşlygyň ösdürilmegi — parahatçylygyň we ynanyşmagyň berk binýady», «Ylmy ösdürmegiň hukuk esaslary», «Ylym we ýokary tehnologiýalar — durnukly ösüşiň binýady», «Ylym-bilim ulgamyndaky özgertmeler — jemgyýetiň ösüşiniň hereketlendiriji güýji» atly bölümçelerde dowam etdi. Bölümçe ýolbaşçylary onda çykyş edýän myhmanlar bilen bilelikde ylym we bilim ulgamynda gazanylan tejribeler we ony ösdürmek ugrunda alnyp barylýan işler dogrusynda pikir alşyp, giňişleýin söhbet etdiler.
Baýnazar BAÝHANOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 1-nji ýyl talyby.