Ykdysady diplomatiýa ugry boýunça okuw sapagy geçirildi
2024-nji ýylyň 11-nji dekabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň «Ykdysady diplomatiýa» ugry boýunça nobatdaky okuw sapagy geçirildi. Oňa Türkmenistanyň Daşary işler ministrliginiň Halkara gatnaşyklary institutynyň talyplary gatnaşdylar. Okuw sapagy «Ýaşyl ykdysadyýetli ösüş» atly temadan geçirildi.
Sapagy Türkmenistanyň Maliýe we ykdysadyýet ministrliginiň baş hünärmeni Annagulyýew Tirkeş Atabaýewiç alyp bardy.
Sapagyň dowamynda milli ykdysadyýetimiziň dürli pudaklarynda energiýa tygşytlaýjy we ekologiýa taýdan arassa tehnologiýalaryň ulanylmagynyň wajyplygy nygtaldy. Şeýle-de ýurdumyzyň ekologiýa syýasatynyň ileri tutulýan ugurlary bolup, «ýaşyl» ykdysadyýete geçmek, tebigy serişdeleri rejeli peýdalanmak we ekologiýa taýdan arassa önümleriň önümçiligini ösdürmek boýunça giň möçberli çäreleriň durmuşa geçirilýändigi hakynda gürrüň edildi.
Talyplar üçin bu okuw sapagy örän täsirli bolup, olar özlerini gyzyklandyrýan sowallara giňişleýin jogap aldylar.
Gülöwser REJEPOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň
III ýyl talyby.