ÝHHG-NIŇ AŞGABATDAKY MERKEZINDE TALYPLAR ÜÇIN OKUW MASLAHATY GEÇIRILDI
2026-njy ýylyň aprel aýynyň 13-14-ine Ýewropada Howpsuzlyk we Hyzmatdaşlyk Guramasynyň (ÝHHG) Aşgabatdaky merkezinde «Ýaşlar we klimat diplomatiýasy: gepleşikleriň ÝHHG modeli» atly iki günlük okuw maslahaty geçirildi. Bu çäre ÝHHG-niň «Howanyň üýtgemegi, daşky gurşawy dolandyrmak we ekologiýa howpsuzlygy babatda hyzmatdaşlygy güýçlendirmek» taslamasynyň çäginde guraldy.
Okuw maslahatyna Türkmenistanyň Daşary işler ministrliginiň Halkara gatnaşyklary institutynyň, Halkara ynsanperwer ylymlary we ösüş uniwersitetiniň, Ýagşygeldi Kakaýew adyndaky Halkara nebit we gaz uniwersitetiniň hem-de Oguz han adyndaky Inžener-tehnologiýalar uniwersitetiniň talyplary we mugallymlary gatnaşdylar.
Bu okuw maslahatynyň esasy maksady ýaşlaryň howanyň üýtgemegi bilen howpsuzlygyň arabaglanyşygy babatyndaky bilimlerini artdyrmakdan, şeýle hem olaryň halkara gepleşikleri geçirmek we konsensus gazanmak ukyplaryny kämilleşdirmekden ybarat boldy. Maslahatyň dowamynda dowamynda talyplar halkara bilermenleriň ýolbaşçylygynda howanyň üýtgemegine degişli dürli ugurlar boýunça çykyşlary diňlediler. Okuwyň amaly böleginde bolsa, olar dürli döwletleriň wekilleriniň keşbini janlandyryp, milli bähbitlerini goradylar we ÝHHG-niň kararlarynyň taslamalaryny taýýarlamak boýunça gepleşikleriň iki tapgyryna gatnaşdylar.
Maslahatyň dowamynda talyplar ýokary işjeňlik we iňlis dilinde erkin pikir aňlatmak başarnygyny görkezip, geljekki diplomatlar hökmünde halkara ekologiýa syýasaty we diplomatiýasy boýunça gymmatly tejribe topladylar.
Hemragylyç NURMÄMMEDOW,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň mugallymy.