V Merkezi Aziýa bilermenleriniň forumy
2022-nji ýylyň 10-njy dekabrynda Türkmenistanyň Daşary işler ministrliginiň Halkara gatnaşyklary institutynda “Howanyň üýtgemegi, suwdan peýdalanmak, azyk howpsuzlygy we Merkezi Aziýa sebitinde maglumat we aragatnaşyk tehnologiýalary boýunça sebitleýin hyzmatdaşlygyň işjeň ugurlary” atly Merkezi Aziýa bilermenleriniň V forumy geçirildi.
Çäräniň açylyşynda Türkmenistanyň Daşary işler ministrliginiň Halkara gatnaşyklary institutynyň rektory, taryh ylymlarynyň kandidaty Jumamyrat Gurbangeldiýew, BMG-nyň Baş sekretarynyň Merkezi Aziýa boýunça ýörite wekili, BMG-nyň Merkezi Aziýa boýunça Öňüni alyş diplomatiýasynyň sebit merkeziniň ýolbaşçysy Natalýa German we Türkmenistanyň Daşary işler ministrliginiň Halkara gatnaşyklary institutynyň prorektory Gülşat Ýusupowa çykyş etdi.
Forumyň çäginde esasan üç mesele boýunça, ýagny “BMG – nyň Klimatyň üýtgemegi baradaky Çarçuwaly konwensiýasyny nazara almak bilen Merkezi Aziýada howanyň üýtgemegine garşy göreşmek we Aral deňziniň basseýninde suw hyzmatdaşlygy”, “Merkezi Aziýa sebitinde azyk howpsuzlygyny üpjün etmek meseleleri” we “Merkezi Aziýa sebitinde maglumat we aragatnaşyk tehnologiýalary ulgamynda howpsuzlygy üpjün etmek meseleleri” boýunça sessiýalar geçirildi.
Bu foruma Merkezi Aziýa döwletleriniň ylmy we seljeriş merkezleriniň wekilleri, ýokary okuw mekdepleriniň ýolbaşçylary, mugallymlary we hünärmenleri we halkara guramalaryň wekilleri gatnaşdylar.
Bu forum Merkezi Aziýada howanyň üýtgemegine garşy göreşmek, suw gorlaryny peýdalanmak we maglumat we aragatnaşyk ulgamlarynyň howpsuzlygyny üpjün etmek meselelerinde sebitiň döwletleriniň arasynda işjeň hyzmatdaşlygy giňeltmekde we mundan beýläkde ösdürmekde uly ähmiýete eýe boldy.
Hojamyrat BAÝLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.
Şeýle hem bu barada şu ýerden okap bilersiňiz: