«Türkmenistanyň Garaşsyzlygynyň XV ýyllygy» seýilgähiniň açylyş dabarasy boldy
2025-nji ýylyň 13-nji sentýabrynda paýtagtymyzda döwrebaplaşdyrylan «Türkmenistanyň Garaşsyzlygynyň XV ýyllygy» seýilgähiniň açylyş dabarasy boldy. Dabara Türkmenistanyň Mejlisiniň deputatlary, ýurdumyzyň ministrlikleriniň we pudaklaýyn dolandyryş edaralarynyň, jemgyýetçilik guramalarynyň ýolbaşçylary hem-de köpçülikleýin habar beriş serişdeleriniň wekilleri, hormatly ýaşulular, talyp ýaşlar, şol sanda Türkmenistanyň Daşary işler ministrliginiň Halkara gatnaşyklary institutynyň talyplary hem gatnaşdylar.
Açylyş dabarasynda bagtyýar çagalaryň şowhunly görkezme çykyşlary ýaýbaňlandyryldy. Çagalar döredijilik toparlarynyň aýdym-sazly çykyşlary dabaranyň mazmunyny artdyrdy. Gurjak artistleriniň sahna görnüşleri tomaşaçylaryň gyzgyn söýgüsine mynasyp boldy. Çagalaryň söýgüli dosty Aşyr dädäniň hem bu dabara gatnaşmagy bagtyýar nesillere ýatdan çykmajak pursatlary bagyşlady. Dabaranyň ahyrynda çagalara Gahryman Arkadagymyzyň hem-de hormatly Prezidentimiziň adyndan ýadygärlik sowgatlar gowşuryldy. Şowhunly sazlaryň astynda görkezilen lazerli çykyşlar bolsa täze seýilgähiň, şeýle hem Aşgabadyň agşamky keşbine has-da öwüşgin çaýdy. Şäheriň tämiz gijesi bilen sazlaşan owadan görnüşler bir salym jadylaýjy dünýä syýahata aýlady.
Bu döwrebap seýilgäh özüniň binagärlik çözgüdi bilen paýtagtymyzyň durmuş maksatly desgalary bilen bir bitewi sazlaşygy emele getirdi. Ol halkymyza mukaddes Garaşsyzlygymyzyň 34 ýyllyk baýramy mynasybetli ajaýyp toý sowgat boldy. Döwrebaplaşdyrylan seýilgähiň açylyp ulanylmaga berilmegi Gahryman Arkadagymyzyň «Döwlet adam üçindir!» diýen ynsanperwer ýörelgesiniň Arkadagly Gahryman Serdarymyzyň parasatly baştutanlygynda dowamat-dowam bolýandygynyň aýdyň nyşanydyr.
Täze seýilgähde ýaş nesilleriň wagtlaryny peýdaly geçirmekleri üçin ähli şertler döredilipdir. Bu ýerde ýörite meýdançalar, güller we dürli baglar seýilgähiň ajaýyp keşbini emele getirýär. Şunuň bilen baglylykda, bu seýilgähiň talyp ýaşlaryň hem iň bir gelim-gidimli ýerleriniň birine öwrüljekdigini ynam bilen aýdyp bileris. Sebäbi bu ýerdäki welosiped ýodalary, dynç alyş bassyrmalary, yşyklandyryş sütünleri ähli ýaşdaky raýatlaryň medeniýetli dynç almaklaryny üpjün eder.
Atamyrat ÝAZWELIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.