TÜRKMEN DIPLOMATIÝASYNYŇ MILLI MEKDEBINIŇ TALYPLARY «FRANKOFONIÝA – 2026» BÄSLEŞIGINIŇ SAÝLAMA TAPGYRLARYNA GATNAŞDYLAR
Türkmenistanyň Daşary işler ministrliginiň Halkara gatnaşyklary institutynyň daşary ýurt dillerini çuňlaşdyryp öwrenmek we medeni diplomatiýany ilerletmek ugrunda alyp barýan işleriniň çäklerinde ýokary okuw mekdebiň talyplary «Frankofoniýa – 2026» bäsleşiginiň saýlama tapgyrlaryna işjeň gatnaşdylar. Bäsleşik Fransiýanyň Türkmenistandaky ilçihanasynyň ýanyndaky Fransuz instituty tarapyndan «Hereketde bolmak» («En mouvement») atly şygar astynda guraldy. Fransuz diliniň diplomatiýanyň esasy dilleriniň biridigini we institutyň döredilen gününden bäri okadylýandygyny bellemek gerek.
Halkara ynsanperwer hyzmatdaşlygy berkitmegi we zehinli ýaşlary ýüze çykarmagy maksat edinen bu bäsleşik birnäçe döredijilik we intellektual ugurlardan ybarat boldy. Talyplar saýlama tapgyrlarda dili biliş derejeleriniň çuňlugyny we sahna ussatlygyny görkezmegi başardylar.
Bäsleşigiň ugurlary boýunça gazanylan netijeler:
Dilden orfografiýa (Orthographe à l’oral): 2026-njy ýylyň 12-nji martynda institutda geçirilen bu ugruň saýlama tapgyryny Fransuz institutynyň direktory Winsent Lorensini we medeniýet meseleleri boýunça attaşesi Mona Lorendel alyp bardy. Halkara gatnaşyklary fakultetiniň 3-nji ýyl talyplary Nurbibi Guljanowa we Sumaýa Nuryýewa Magtymguly adyndaky Türkmen döwlet uniwersitetiniň hem-de Döwletmämmet Azady adyndaky Türkmen milli dünýä dilleri institutynyň talyplary bilen jemleýji tapgyrda bäsleşmäge hukuk gazandylar. Olar bu tapgyrda «birme-bir» görnüşde bäsleşerler.
Aýdym aýtmak bäsleşigi (Concours de chanson): «En mouvement» temasy boýunça fransuz saz sungatynyň nusgawy eserlerini ýerine ýetirmekde Halkara ykdysady gatnaşyklary fakultetiniň we Halkara žurnalistikasy fakultetiniň 3-nji ýyl talyplary Mähri Guzyçyýewa hem-de Sona Abaýewa öz ussatlyklaryny görkezdiler. Eminler aýdymçylara dört kriteriýa: aýdymyň tema gabat gelmegi, dili biliş derejesi, sahna medeniýeti we ýerine ýetirijilik ukyby boýunça baha bererler.
Düzme ýazmak bäsleşigi (Concours d’écriture): Fransuz institutynda guralan bu tapgyrda talyplar analitiki pikirlerini fransuz dilinde erkin we döredijilikli beýan etdiler.
Saýlama tapgyrlarda tapawutlanan talyplar 2026-njy ýylyň 4-nji aprelinde geçiriljek jemleýji tapgyra we sylaglamak dabarasyna gatnaşarlar.
Talyplarymyzyň gazanan üstünlikleri ýurdumyzda ýaşlaryň hemmetaraplaýyn ösmegi üçin döredilýän giň mümkinçilikleriň aýdyň subutnamasydyr. Bäsleşige gatnaşyjylar bilim ulgamyny yzygiderli goldaýan, daşary ýurt dillerini öwrenmek üçin döwrebap şertleri döredýän hem-de türkmen diplomatiýasynyň halkara abraýyny belende göterýän Gahryman Arkadagymyza we Arkadagly Gahryman Serdarymyza tüýs ýürekden sagbolsun aýdýarlar.
Ogulbeg GAZAKOWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä
dilleri kafedrasynyň fransuz dili mugallymy.