TÜRKMEN BITARAPLYGYNYŇ 30 ÝYLLYGY MYNASYBETLI WAGYZ-NESIHAT DUŞUŞYGY
Ýakynda Halkara parahatçylyk we ynanyşmak ýylynyň şygarynyň many-mazmunyny düşündirmek boýunça Aşgabat we Arkadag şäherleriniň orta mekdeplerinde geçirilýän wagyz-nesihat duşuşyklarynyň tassyklanan meýilnamasyna laýyklykda, Türkmenistanyň Daşary işler ministrliginiň Halkara gatnaşyklary institutynyň mugallymlarynyň we talyp ýaşlarynyň gatnaşmagynda Aşgabat şäheriniň daşary ýurt dillerini çuňlaşdyrylyp öwredilýän ýöriteleşdirilen 4-nji, 16-njy orta mekdeplerinde wagyz-nesihat duşuşygy geçirildi.
Duşuşykda çykyş eden mugallymlar we talyplar şöhratly ata-babalarymyzdan miras galan parahatçylyk söýüjilik, agzybirlik, ynsanperwerlik, dost-doganlyk ýörelgeleri, Garaşsyz Watanymyzyň hemişelik Bitaraplyk hukuk ýagdaýynyň BMG-niň Baş Assambleýasynyň Kararnamalaryna laýyklykda üç gezek ykrar edilmegi, geçen taryhy döwürde toplanan daşary syýasy we diplomatik tejribe, Bitaraplyk syýasatynyň milli bähbitlere, Birleşen Milletler Guramasynyň maksatlaryna doly laýyk gelýändigi dogrusynda giňişleýin gürrüň berdiler.
Wagyz-nesihat duşuşygynyň dowamynda okuwçylar özlerini gyzyklandyrýan sowallary berip, türkmen Bitaraplygy we onuň ähmiýeti bilen bagly düşünjelerini has-da berkitdiler.
Halkara parahatçylyk we ynanyşmak ýylynyň şygarynyň many-mazmunyny düşündirmek boýunça geçirilen wagyz-nesihat duşuşygy ýaş nesli watansöýüjilik ruhunda terbiýelemekde uly ähmiýete eýe boldy.
Gülnara MYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.