SANLY ULGAM ARKALY WEBINAR GEÇIRILDI
2025-nji ýylyň 5-nji maýynda Türkmenistanyň Daşary işler ministrliginiň Halkara gatnaşyklary institutynda Türkmenistanyň hemişelik Bitaraplygynyň 30 ýyllygyna, Birleşen Milletler Guramasynyň Baş Assambleýasy tarapyndan 2025-nji ýylyň “Halkara parahatçylyk we ynanyşmak ýyly” diýlip yglan edilmegine we bu ugurda alnyp barylýan işlerde ýaşlaryň eýeleýän ornuna bagyşlanan webinar geçirildi. Oňa institutyň talyp ýaşlary hem-de sanly ulgam arkaly Türkmenistanyň ýokary we orta hünär okuw mekdepleriniň talyplarydyr mugallymlary gatnaşdylar.
Sanly ulgam arkaly geçirilen webinarda Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary we diplomatiýa kafedrasynyň uly mugallymy, filosofiýa ylymlarynyň kandidaty Begenç Karaýew “Halkara gatnaşyklarynda Türkmenistanyň bitaraplyk syýastynyň ähmiýetiniň artmagy” atly tema boýunça çykyş etdi. Çykyşynyň dowamynda halypa mugallym ýurdumyzyň halkara gatnaşyklarynda alyp barýan hemişelik Bitaraplyk syýasaty we onuň taryhy kökleri, häzirki döwürde parahatçylygy, howpsuzlygy we durnukly ösüşi üpjün etmekdäki geçen taryhy döwründe gazanan oňyn tejribeleri dogrusynda gürrüň berdi.
Bu geçirilen webinar diňe bir geljekki halkaraçy hünärmenleriň däl, eýsem, ýurdumyzyň beýleki pudaklarynda zähmet çekjek talyp ýaşlaryň Türkmenistanyň hemişelik Bitaraplyk derejesiniň dünýä ýüzündäki eýeleýän orny dogrusyndaky bilimlerini artdyrmakda uly ähmiýete eýe boldy.
Şyhdurdy ŞYHYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.