Sirkulýar ykdysadyýeti boýunça okuw maslahaty geçirildi
2026-njy ýylyň 5-6-njy maýynda Türkmen döwlet maliýe institutynda Ýewropada Howpsuzlyk we Hyzmatdaşlyk Guramasynyň (ÝHHG) Aşgabatdaky merkeziniň guramagynda “Sirkulýar ykdysadyýeti ösdürmek” atly okuw sapagy geçirildi.
Okuw sapaklaryna Magtymguly adyndaky Türkmen döwlet uniwersitetiniň, Türkmenistanyň Daşary işler ministrliginiň Halkara gatnaşyklary institutynyň, Türkmen döwlet ykdysadyýet we dolandyryş institutynyň, Halkara ynsanperwer ylymlary we ösüş uniwersitetiniň, şeýle hem Türkmen döwlet maliýe institutynyň talyplary we mugallymlary gatnaşdylar.
Bu okuw sapagynyň esasy maksady ýaşlaryň sirkulýar ykdysadyýeti babatyndaky bilimlerini artdyrmakdan, bu ugurda halkara tejribesi bilen tanyşdyrmakdan ybarat boldy. Okuw sapagynyň dowamynda talyplar halkara bilermenleriň ýolbaşçylygynda sirkulýar ykdysadyýeti, onuň esasy düşünjeleri, çemeleşmeleri we biznes modelleri baradaky çykyşlary diňlediler. Okuw sapaklarynyň ahyrynda bolsa bu mowzuklar boýunça sorag - jogap alyşyldy. Bu okuw sapaklary ýaşlaryň ykdysadyýet, ekologiýa we durnukly ösüş ugurlary boýunça bilimlerini baýlaşdyrmakda ähmiýetli çäre boldy.
Aýjahan GULHANOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň 5-nji ýyl talyby