«PARAHATÇYLYK MEDENIÝETI» ATLY ÝUNESKO KLUBYNYŇ HASABAT ÝYGNAGY GEÇIRILDI
2026-njy ýylyň 10-njy fewralynda Türkmenistanyň Daşary işler ministrliginiň Halkara gatnaşyklary institutynda hereket edýän «Parahatçylyk medeniýeti» atly ÝUNESKO klubynyň nobatdaky hasabat ýygnagy geçirildi. Çäre ÝUNESKO-nyň gymmatlyklaryny wagyz etmek, ýaşlaryň halkara hyzmatdaşlyga gatnaşygyny giňeltmek hem-de klubyň geljekki wezipelerini kesgitlemek maksady bilen guraldy.
Hasabat ýygnagyna ÝUNESKO-nyň işleri boýunça Türkmenistanyň Milli toparynyň Sekretariatynyň referendi Aýbölek Kakabaýewa we klubyň agzalary gatnaşdylar.
Çykyşlaryň dowamynda klubyň 2025-nji ýylda alyp baran köptaraply işleri barada giňişleýin maglumat berildi. Bellenilişi ýaly, hasabat döwründe halkara we milli derejede dürli maslahatlar, tegelek stol söhbetdeşlikleri, wagyz-nesihat çäreleri, medeni hem-de bilim taslamalary üstünlikli durmuşa geçirildi. Bu başlangyçlar talyplaryň Türkmenistan bilen ÝUNESKO-nyň hyzmatdaşlygyny giňden wagyz etmäge, hem-de parahatçylyk, dialog we özara düşünişmek ýörelgelerine ygrarlylygyny pugtalandyrmaga ýardam berdi.
Sekretariatyň wekili öz çykyşynda klubyň alyp baran işlerine ýokary baha berip, gazanylan netijeleriň bu ugurda (klublaryň arasynda) halkara hyzmatdaşlygy ösdürmekde möhüm ähmiýete eýedigini belledi.
Maslahatyň ahyrynda 2026-njy ýylda amala aşyrylmagy meýilleşdirilýän çäreler barada pikir alşyldy, öňde goýlan wezipeleri üstünlikli ýerine ýetirmek ugrunda degişli tabşyryklar kesgitlenildi.
Oguldürli GELDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.