«Parahatçylygyň ýaş çaparlary»: yhlasa mynasyp baha
2024-nji ýylyň 31-nji maýynda Türkmenistanyň Daşary işler ministrliginiň Halkara gatnaşyklary institutynda «Parahatçylygyň ýaş çaparlary» atly akyl-paýhas bäsleşiginiň III möwsüminiň guramaçylykly geçirilmegine işjeň gatnaşan institutyň mugallymlaryny, işgärlerini hem-de talyplaryny sylaglamak dabarasy boldy.
Mälim bolşy ýaly, 2021-nji ýylda Türkmenistanyň Daşary işler ministrliginiň Halkara gatnaşyklary institutynda Gahryman Arkadagymyzyň tagallasy bilen açylan Ýaş diplomatlaryň mekdebi ýurdumyzyň mekdep okuwçylarynyň arasynda ykbalyny diplomatiýa hünärine baglamak isleýän ýaş zehinleri ýüze çykarmak babatda uly işleri alyp barýar. Bu ugurda dürli olimpiadalar, ders bäsleşikleri geçirilýär. Olaryň iň naýbaşysy «Parahatçylygyň ýaş çaparlary» atly akyl-paýhas bäsleşigidir. Bu bäsleşik mekdep okuwçylary üçin diplomatiýa dünýäsine özboluşly girelgedir. Onuň üstünlikli geçirilen iki möwsüminiň ýeňijileri bu günki gün türkmen diplomatiýasynyň milli mekdebiniň bagtyýar talyplarydyr.
Ýakynda bolsa bu meşhur akyl-paýhas bäsleşiginiň «Beýik Magtymguly Pyragynyň taglymaty — umumadamzat gymmatlyklarynyň milli şamçyragy» atly şygar bilen geçirilen III möwsümi üstünlikli jemlendi. Sylaglamak dabarasynda bäsleşigiň bu möwsüminiň degişli talaplara laýyklykda ýokary guramaçylykly geçirilmegi, ýaýlyma birkemsiz gitmegi, onuň her bir pursadynyň özboluşly öwüşginler bilen bezelmegi üçin yhlasly zähmet çeken institutyň mugallymlaryna, işgärlerine hem-de talyplaryna minnetdarlyk bildirildi. Bu babatda institutyň Halkara gatnaşyklary we diplomatiýa kafedrasynyň uly mugallymy, filosofiýa ylymlarynyň kandidaty Begenç Karaýew, Jemgyýeti öwreniş ylymlary kafedrasynyň müdiriniň w.w.ý.ý., uly mugallym, taryh ylymlarynyň kandidaty Aýna Baýmuradowa, Žurnalistikanyň nazaryýeti we amalyýeti kafedrasynyň mugallymy Gülnabat Begenjowa, institutyň okuw studiýasynyň işgäri Mekan Öwezberdiýew, şeýle-de Halkara gatnaşyklary fakultetiniň talyplary — Şasenem Meýlisowa, Nurmuhammet Annamyradow, Muhammet Haýdarow, Halkara žurnalistikasy fakultetiniň talyplary — Döwletgeldi Borjakow, Amangeldi Ýegenow, Serdar Borjakow, Humaý Meredowa dagylar ýokary işjeňlik görkezdiler. Olara Türkmenistanyň Daşary işler ministrliginiň Halkara gatnaşyklary institutynyň Hormat hatlary hem-de «Aýdyň gijeler» hojalyk jemgyýetiniň gymmat bahaly sowgatlary dabaraly ýagdaýda gowşuryldy.
Bu dabara biziň ýurdumyzda, şol sanda ýokary okuw mekdebimizde hem yhlasly, tutanýerli çekilen zähmete mynasyp baha berilýändiginiň aýdyň beýanyna öwrüldi.
Atamyrat ÝAZWELIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.