«ÖSÜŞE AK ÝOL» ATLY YLMY-TASLAMA BÄSLEŞIGI GEÇIRILDI
2026-njy ýylyň 4-nji iýulynda Türkmenistanyň Daşary işler ministrliginiň Halkara gatnaşyklary institutynda «Ýaş ykdysatçylar» ylmy gurnagynyň guramagynda talyplaryň arasynda ýaş oýlap tapyjylary ýüze çykarmak, olary telekeçilik işine çekmek maksady bilen «Ösüşe ak ýol» atly ylmy-taslama bäsleşigi geçirildi. Oňa türkmen diplomatiýasynyň milli mekdebiniň talyplary tarapyndan taýýarlanan dürli işler hödürlendi.
Häzirki wagtda ýurdumyzda ýaş nesilleriň ylymly-bilimli, giň dünýägaraýyşly, döwrebap tehnologiýalardan kämil baş çykarýan şahsyýetler bolup ýetişmegi ugrunda döwletimiz tarapyndan ägirt uly işler amala aşyrylýar. Bu babatda kabul edilen maksatnamalardan gelip çykýan wezipeler yzygiderli durmuşa geçirilýär. Munuň şeýledigini «Türkmenistanda ylym ulgamyny ösdürmegiň 2024 — 2052-nji ýyllar üçin Strategiýasy», «Türkmenistanda ýokary hünär bilimini ösdürmegiň 2026 — 2052-nji ýyllar üçin Strategiýasy» hem doly aýdyňlygy bilen tassyklaýar.
Hormatly Prezidentimiz: «Ýurdumyzda bilim ulgamyny dünýä ülňülerine, umumy ykrar edilen halkara kadalara we öňdebaryjy tejribelere laýyk kämilleşdirmek, ýaş nesillerimizi milli hem-de umumamdamzat gymmatlyklarynyň esasynda terbiýelemek, olara döwrebap bilim bermek biziň alyp barýan bilim syýasatymyzyň baş maksadydyr» diýip belleýär. Şunuň bilen baglylykda, talyp ýaşlaryň arasynda ylym-bilim bäsleşikleridir ders olimpiadalarynyň yzygiderli geçirilmegi möhüm ähmiýete eýedir.
«Ösüşe ak ýol» ylmy-taslama bäsleşigine intitutymyzyň Halkara ykdysady gatnaşyklary fakultetiniň 1-nji ýyl talyplary Medine Jeýhunowa, Allanur Şyhyýew we 3-nji ýyl talyby Dawut Gezerow işjeň gatnaşdylar. Bäsleşigiň netijeleri boýunça ýeňijileri sylaglamak dabarasyny mukaddes Garaşsyzlygymyzyň 35 ýyllygy mynasybetli guraljak baýramçylyk çäreleriniň dowamynda geçirmek meýilleşdirilýär.
Myrat MAKSADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň
2-nji ýyl talyby