Onlaýn okuw – usuly maslahaty geçirildi
2024-nji ýylyň 22-nji noýabrynda Seýitnazar Seýdi adyndaky Türkmen döwlet mugallymçylyk institutynda “Ýokary okuw jaýlarynda talyplaryň ekologiki
bilimini kämilleşdirmekde täze usuly çemeleşmeler” atly onlaýn okuw – usuly
maslahaty geçirildi. Maslahata Türkmenistanyň Daşary işler ministrliginiň Halkara
gatnaşyklary institutynyň “Parahatçylyk medeniýeti” atly ÝUNESKO klubunyň
agza mugallymlary we talyp ýaşlary onlaýn arkaly gatnaşdylar. Onda ýurdumyzyň
ýokary okuw mekdepleriniň professor- mugallymlarydyr talyp ýaşlary, şeýle hem
ýurdumyzda hereket edýän ÝUNESKO kafedralarynyň we klublarynyň agzalary
çykyş etdiler. Edilen çykyşlaryň dowamynda ýurdumyzda ekologiýa babatda öňe
sürülýän halkara başlangyçlar, Arkadagly Gahryman Serdarymyzyň ekologiýa
ulgamyny gorap saklamakda edýän taýsyz tagallalary, ýokary okuw mekdeplerinde
ýaşlara ekologiýa biliminiň öwredilişi barada giňişleýin agzalyp geçildi.
Häzirki wagtda ýurdumyzda ýaşlaryň ekologiýa bilimlerini
kämilleşdirmekde uly işler amala aşyrylýar. Türkmenistan ekologiýany goramak
meselesi boýunça birnäçe halkara başlangyçlar bilen çykyş edýär. BMG-niň Daşky
gurşawy goramak boýunça Konwensiýalaryna goşulýar. Ýeri gelende belläp
geçsek, Türkmenistanyň wekiliýeti 11-22-nji noýabr aralygynda Baku şäherinde
geçirilen BMG-niň Howanyň üýtgemegi baradaky Çarçuwaly konwensiýasyna
gatnaşyjy taraplaryň konferensiýasynyň 29-njy mejlisine (COP29) gatnaşdy.
Şyhdurdy ŞYHYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.