Onlaýn görnüşinde geçirilen maslahat
2021-nji ýylyň 16-njy noýabrynda ýurdumyzda BMG-niň Halkara söwda hukugy boýunça komissiýasy tarapyndan “1958-nji ýylyň Daşary ýurt arbitražynyň çözgüdini ykrar etmek we ýerine ýetirmek hakyndaky hem-de 1980-nji ýylyň BMG-niň Harytlary halkara satyn almak-satmak boýunça şertnamalar hakyndaky Konwensiýalary” atly onlaýn maslahat geçirildi. Oňa Türkmenistanyň ministrlikleriniň, pudaklaýyn dolandyryş we hukuk goraýjy edaralarynyň, jemgyýetçilik guramalarynyň wekilleri hem-de Diýarymyzyň ýokary okuw mekdepleriniň, şol sanda Türkmenistanyň Daşary işler ministrliginiň Halkara gatnaşyklary institutynyň professor-mugallymlary we talyp ýaşlary gatnaşdylar.
Iňlis we rus dillerinde alnyp barlan bu maslahatda çykyş edenler Konwensiýalara goşulyşmagyň mümkinçilikleri, milli hünärmenleriň we talyplaryň habarlylygyny ýokarlandyrmagyň ýollary, Halkara söwda guramalarynyň Türkmenistan bilen alyp barýan hyzmatdaşlygynyň ugurlary, şeýle hem BMG-niň Halkara söwda hukugy boýunça komissiýasynyň (UNCITRAL) alyp barýan işleri barada gürrüň berdiler. Okuw maslahatynyň dowamynda talyplara we hünärmenlere arbitraž we söwda hukugy boýunça gyzykly maglumatlar berildi.
Çärä gatnaşanlaryň nygtap aýtmagyna görä, şeýle maslahatlaryň yzygiderli geçirilmegi ýurdumyzda ýaş hukukçylaryň biliminiň kämilleşdirilmegine, olaryň hünär derejeleriniň ýokarlandyrylmagyna, durmuşa geçirilýän kanunçylyk işleriniň binýadynyň has-da berkidilmeginde oňyn täsir edýär.
Leýli ARAPOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy hünäriniň 1-nji ýyl talyby.