OKUW SAPAGY GEÇIRILDI
2024-nji ýylyň 20-nji noýabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň guramagynda «Turgundy demir ýol bekediniň “gury portunda” ammarlar toplumynyň gurulmagynyň ykdysady ähmiýeti» atly okuw sapagy geçirildi. Bu okuw sapagyny Türkmenistanyň Senagatçylar we telekeçiler partiýasynyň agzasy, «Bir Kuwwat» hususy kärhanasynyň hünärmeni Röwşen Kakajanow alyp bardy. Okuw sapagynyň dowamynda 2024-nji ýylyň 11-nji sentýabrynda Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň gatnaşmagynda energetika, ulag-kommunikasiýa we logistika degişli ýedi sany taslama — Türkmenistan — Owganystan— Pakistan — Hindistan gaz geçirijisiniň esasy tapgyry bolan Arkadagyň ak ýoly bilen Serhetabat — Hyrat gaz geçirijisiniň, optiki-süýümli aragatnaşyk ulgamynyň, Mary welaýatynyň çäginde «Şatlyk-1» gaz gysyjy desgasynyň gurluşygyna badalga berildigi barada aýdyldy. Şeýle hem Turgundy — Hyrat demir ýolunyň birinji tapgyrynyň Turgundy — Sanabar aralygynyň we “Turgundy” demir ýol bekediniň «gury portunda» ammarlar toplumynyň gurluşyk işlerine we Serhetabat — Turgundy demir ýol geçelgesiniň türkmen-owgan serhedindäki uzynlygy 177 metr bolan demir ýol köprüsiniň ulanmaga berilmeginiň ykdysady ähmiýeti barada gürrüň edildi. Şeýle-de magistrantlar we talyplar özlerini gyzyklandyrýan soraglaryna jogap tapdylar hem-de ulag diplomatiýasy baradaky bilimlerini artdyrdylar.
Aýmyrat MUHAMOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň II ýyl talyby.