“NIPPON” GAZNASYNYŇ KITAPLARYNYŇ GOWŞURYLYŞ DABARASY
2025-nji ýylyň 4-nji iýunynda Ýaponiýanyň Türkmenistandaky Adatdan daşary we Doly ygtyýarly Ilçisi Hiroşi Sasakiniň gatnaşmagynda Türkmenistanyň Daşary işler ministrliginiň Halkara gatnaşyklary institutynda “Nippon” gaznasynyň iňlis dilindäki Ýaponiýa barada tanyşdyryş kitaplarynyň gowşurylyş dabarasy geçirildi. Bu guramaçylykly geçirilen çäräniň baş maksady ýurdumyzda ýapon diliniň öwredilşine ýardam bermekden we öwrenijilerde dile bolan gyzyklanmany artdyrmakdan ybaratdyr.
Sowgat hökmünde gelip gowşan kitaplaryň esasy bölegini ýapon diliniň amaly sapaklary üçin niýetlenen ýörite gollanmalar düzýär. Şeýle-de ýapon medeniýetine, taryhyna, ykdysadyýetine we döwlet syýasatyna bagyşlanan kitaplar hem aýratyn orun eýeleýär.
Bilim ulgamynda alnyp barylýan türkmen-ýapon gatnaşyklarynyň çäklerinde şunuň ýaly çäreleriň geçirilmegi ýaşlarda ýapon dilini öwrenmäge bolan höwesi, kitaba bolan söýgini has hem artdyrýar we dostlukly gatnaşyklaryň berkemegine ýardam edýär.
Dünýägözel BABAHANOWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň mugallymy.