"MODEL UNESCO − 2025" bäsleşigi geçirildi
2025-nji ýylyň 17-nji oktýabrynda Maddy däl medeni mirasy goramagyň halkara güni mynasybetli Türkmenistanyň Daşary işler ministrliginiň Halkara gatnaşyklary institutynda “Parahatçylyk medeniýeti” atly ÝUNESKO klubynyň gurnamagynda “MODEL UNESCO – 2025” atly bäsleşigi üstünlikli geçirildi. Oňa ýurdumyzyň ýokary okuw mekdeplerinde hereket edýän ÝUNESKO kafedralaryna we klublaryna agza bolan talyplar gatnaşdylar.
Bu çäre talyp ýaşlaryň ÝUESKO-nyň işini has çuňňur öwrenmäge bolan höwesini we ukyp-başarnyklaryny artdyrmak maksady bilen üç tapgyrda geçirildi. Birinji tapgyrda oňa gatnaşyjylar bir döwlete wekilçilik edip, şol döwletiň islendik bir gymmatlygynyň ÝUNESKO-nyň Maddy däl medeni mirasynyň sanawyna girizilmegini gazanmak ugrunda çykyş etdiler. Ikinji tapgyrda bolsa wekilleriň beren sesleri esasynda iň köp ses alan gymmatlyk barada Kararnama kabul edildi. Üçünji tapgyrda emin agzalary tarapyndan “Iň gowy prezentasiýa”, “Iň gowy wekil” hem-de “Iň gowy çykyş” ugurlary boýunça aýratyn tapawutlanan gatnaşyjylar saýlandy.
Onda üstünlikli çykyş eden talyplar institutyň Hormat hatlary we ýadygärlik sowgatlary bilen sylaglandy. Bäsleşik tamamlanandan soň, talyplar hormatly Prezidentimize parahatçylygy, howpsuzlygy we durnuklylygy, şeýle-de dünýä halklarynyň gülläp ösmegini üpjün etmek ugrundaky başlangyçlary hem tagallalary üçin tüýs ýürekden hoşallyk bildirdiler.
Sahydöwlet HÜMMETJUMAÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.