Merkezi Aziýada diasporalaryň ösüşi – durnukly ösüşiň möhüm faktory
2022-nji ýylyň 10-njy maýynda Türkmenistanyň Daşary işler ministrliginiň Halkara gatnaşyklary institutynda Özbegistan Respublikasynyň Mirza Ulugbeg adyndaky Milli uniwersitetiniň we Merkezi Aziýa halkara institutynyň bilelikde guramagynda “Merkezi Aziýada diasporalaryň ösüşi – durnukly ösüşiň möhüm faktory” atly sanly ulgam arkaly halkara ylmy-amaly maslahaty geçirildi.
Maslahatyň işine Gazagystanyň, Gyrgyzystanyň, Täjigistanyň, Türkmenistanyň, Özbegistanyň, Russiýa Federasiýasynyň, Germaniýanyň, Polşanyň we Germaniýanyň K.Adenauer fondunyň Özbegistandaky wekili gatnaşdylar.
Maslahatyň dowamynda türkmen tarapyndan Türkmenistanyň Daşary işler ministrliginiň Halkara gatnaşyklary institutynyň rektory J.Gurbangeldiýew we Strategik barlaglar boýunça ylmy merkeziň ylmy işgäri D.Mämmedow çykyş etdiler.
J.Gurbangeldiýew öz çykyşynda sebitde durnukly ösüşi, parahatçylygy we asudalygy üpjün etmek maksady bilen, Türkmenistan eýýäm garaşsyzlygyň ilkinji ýyllaryndan başlap, daşary ýurtlardaky türkmen diasporalary bilen aragatnaşygy ýola goýmak üçin Dünýä türkmenleriniň ynsanperwer birleşiginiň döredilendigini, Garaşsyz Döwletleriň Arkalaşygyna girýän ýurtlarda, ilkinji nobatda, Özbegistanda, Gazagystanda we Russiýada ýaşaýan türkmenleriň etnik toparlary we diasporalary bilen gatnaşyklaryň ýola goýulandygyny belläp geçdi.
Diasporalar döwletleriň arasynda ynsanperwer, medeni we işewürlik gatnaşyklary guramaga saldamly goşant goşýar. Şu nukdaýnazardan, ýurdumyzdaky milli diasporalar bilen bir hatarda özbek diasporasy hem türkmen halky bilen ysnyşykly gatnaşyklary saklaýar. Şeýle hem olaryň ylalaşykly ýaşamaklary üçin ähli degerli tagallalar edilýär we milli-etnik özboluşlylygynyň, däp-dessurlarynyň, dini-ygtykatlarynyň hem-de medeniýetiniň saklanylmagyna gönükdirilen syýasaty alyp barýar.
Tawus AKJAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.