MEKDEP OKUWÇYLARYNYŇ ARASYNDA DERS OLIMPIADASYNYŇ I TAPGYRY GEÇIRILDI
2026-njy ýylyň 6-njy aprelinde Türkmenistanyň Daşary işler ministrliginiň Halkara gatnaşyklary institutynda «Watanyň daýanjy — bilimli ýaşlar, Arkadagly Gahryman Serdaryň guwanjy ýaşlar!» atly Türkmenistanyň taryhy, matematika, türkmen dili, iňlis dili dersleri boýunça olimpiadanyň I tapgyry geçirildi.
Birleşen Milletler Guramasy tarapyndan yglan edilen Halkara bilim güni mynasybetli geçirilen olimpiada ýurdumyzyň orta mekdepleriniň 12-nji synp okuwçylarynyň arasynda guraldy. Olimpiadanyň esasy maksady zehinli mekdep okuwçylaryny ýüze çykarmakdan, olaryň giriş synaglarynda tabşyrjak dersleri boýunça bilimleriniň derejesini kesgitlemekden hem-de dürli dersler boýunça ukyp-başarnyklaryny kämilleşdirmekden ybaratdyr.
Häzirki wagtda ýurdumyzyň röwşen geljegi bolan ýaşlaryň döwrebap bilim almaklary, olaryň giň dünýägaraýyşly, kämil şahsyýetler bolup ýetişmekleri ugrunda döwletimiz tarapyndan ägirt uly alada edilýär. «Ýaşlar barada döwlet syýasaty hakynda» Türkmenistanyň Kanunynyň rejelenen görnüşiniň kabul edilmegi hem munuň aýdyň nyşanydyr. Ýeri gelende bellesek, hormatly Prezidentimiziň Karary bilen tassyklanan «Türkmenistanyň ýaşlarynyň halkara hyzmatdaşlygynyň 2023 — 2030-njy ýyllar üçin Strategiýasy» hem ýaşlaryň halkara hyzmatdaşlygyny hemmetaraplaýyn ösdürmek üçin giň mümkinçilikleri we şertleri döredýär. Strategiýanyň maksady türkmen ýaşlarynyň dünýä ýurtlarynyň ýaşlary bilen dostlukly gatnaşyklaryny mundan beýläk-de berkitmekden, ösdürmekden, daşary döwletlerde geçirilýän halkara forumlara, ylmy bäsleşiklere yzygiderli gatnaşyp, pikir we tejribe alyşmaklaryny üpjün etmekden ybaratdyr.
Türkmen diplomatiýasynyň milli mekdebi tarapyndan Türkmenistanyň taryhy, matematika, türkmen dili, iňlis dili dersleri boýunça guralan olimpiada hem ýurdumyzyň mekdep okuwçylarynyň intellektual derejesini kesgitlemäge, okgunly ösýän bazar ykdysadyýeti şertlerinde innowasion tehnologiýalary ulanmakdan baş çykarýan we çylşyrymly meseleleri özbaşdak çözmegi başarýan zehinli ýaşlary ýüze çykarmakda möhüm ähmiýete eýedir.
Ders olimpiadasynyň I tapgyryna ýurdumyzyň ähli welaýatlaryndan we Aşgabat, Arkadag şäherlerinden mekdep okuwçylarynyň 900-e golaýy gatnaşdy. Olimpiadanyň I tapgyrynyň netijeleri ýakyn wagtda institutyň resmi internet sahypasynda ýerleşdiriler we ondan üstünlikli geçen gatnaşyjylar olimpiadanyň II tapgyryna gatnaşmaga hukuk gazanarlar.
Yhlas HALLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 3-nji ýyl talyby.