HALKARA YLMY MASLAHATY GEÇIRILDI
2025-nji ýylyň 15-nji oktýabrynda Magtymguly adyndaky Türkmen döwlet uniwersitetinde «Mahmyt Kaşgarlynyň «Diwany lugat at-türk» sözlüginde parahatçylygyň we ynanyşmagyň orny» atly utgaşykly görnüşde halkara ylmy maslahaty we onuň çäklerinde Türki medeniýeti we mirasy gaznasy tarapyndan taýýarlanan Magtymguly Pyragynyň «Aşyk bolmuşam» atly kitabynyň tanyşdyrylyş dabarasy geçirildi. Oňa Türkmenistandan, Gazagystan Respublikasyndan, Eýran Yslam Respublikasyndan, Özbegistan Respublikasyndan, Hindistan Respublikasyndan, Moldowa Respublikasyndan, Türkiýe Respublikasyndan alymlar hem-de ýurdumyzyň ýokary okuw mekdepleriniň professor-mugallymlary we talyp ýaşlary gatnaşdylar.
Maslahatda Mahmyt Kaşgarlynyň «Diwany lugat at-türk» eserini öwrenmekde Türkmenistanda alnyp barylýan işler, Türki medeniýetiniň we mirasynyň gaznasynyň «Diwany lugat at-türk» eserini türki dünýäsiniň ruhy mirasy hökmünde gorap saklamakdaky we wagyz etmekdäki orny, alymyň sözlüginiň türki dilleriniň maglumatlaryny öwrenmekdäki ähmiýeti, «Diwany lugat at-türk» eseri barada alnyp barylýan ylmy işler, bu eserde ynsanperwer gymmatlyklaryň beýan edilişi, onuň bilen bagly ylmy garaýyşlar barada giňişleýin durlup geçildi.
Halkara ylmy maslahatyň çäklerinde Türki medeniýetiniň we mirasynyň gaznasy tarapyndan taýýarlanan Magtymguly Pyragynyň «Aşyk bolmuşam» atly kitabynyň tanyşdyrylyş dabarasy hem geçirildi. Şol sanda halkara ylmy maslahat öz işini «Mahmyt Kaşgarlynyň «Diwany lugat at-türk» eseriniň dünýä filologiýasyna goşandy», «Mahmyt Kaşgarlynyň «Diwany lugat at-türk» eseriniň ynsanperwer ylmyny ösdürmekdäki orny» atly bölümçelerde dowam etdirdi.
Myrat AMANOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.