HALKARA ÝARYŞLARYNY ŞÖHLELENDIRMEKDE SPORT ŽURNALISTIŇ AÝRATYNLYGYNA WE ÝAŞ ŽURNALISTIŇ HÜNÄR ETIKASYNA BAGYŞLANAN OKUW SAPAGY GEÇIRILDI
2026-njy ýylyň 10-njy fewralynda Türkmenistanyň Daşary işler ministrliginiň Halkara gatnaşyklary institutynda şu ýylyň 11-nji fewralynda Aşgabat şäherinde geçirilýän Türkmenistanyň «Arkadag» futbol kluby bilen Saud Arabystanynyň «Al-Nasr» toparynyň arasynda AFC-2 Çempionlar ligasynyň 1/8 finalynyň ilkinji duşuşygyny şöhlelendirmek maksady bilen ýurdumyzyň ýokary okuw mekdeplerinden gatnaşjak ýörite habarçylar (media) toparynyň ýaş wagyzçylary bilen sanly ulgam arkaly nobatdaky okuw sapagy geçirildi. Oňa habarçylar (media) toparynyň agzalary sanly ulgam arkaly gatnaşdylar.
Okuw sapagyny «Sport žurnalistiniň aýratynlygy» atly tema boýunça «Türkmenistan Sport» halkara žurnalynyň baş redaktory Hojaberdi Apbaýew hem-de «Halkara ýaryşlaryny şöhlelendirmekde ýaş žurnalistiň hünär etikasy» atly tema boýunça Türkmenistanyň Daşary işler ministrliginiň Halkara gatnaşyklary institutynyň Žurnalistikanyň nazaryýeti we amalyýeti kafedrasynyň uly mugallymy Jemile Pürjäýewa alyp bardy. Okuw sapagynyň dowamynda çykyş eden halypalar dostlugyň ilçisi hasaplanylýan sport diplomatiýasynyň ähmiýeti, ýurdumyzda geçiriljek sport baýramçylygy günlerinde žurnalistler üçin gurnalan çäreleriň, brifingdir metbugat duşuşyklarynyň aýratynlygy, olary şöhlelendirmekde sport žurnalistleriniň ussatlygy, bu işde meýletinçi habarçylaryň orny, halkara sport ýaryşlar döwründe ýaş žurnalistiň hünär etikasy barada täsirli gürrüň berdiler.
Şeýle-de habarçylar (media) toparynyň agzalary – ýaş wagyzçylara ýurdumyzda öz hünär ugurlary boýunça halkara tejribesini toplamakda döredilýän ähli mümkinçilikler üçin Gahryman Arkadagymyza, hormatly Prezidentimize alkyş sözlerini aýtdylar.
Aýşirin DÖWLETOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
4-nji ýyl talyby.