Halkara Parahatçylyk güni mynasybetli okuw sapagy geçirildi
2022-nji ýylyň 21-nji sentýabrynda Türkmenistanyň Daşary işler ministrliginiň Halkara gatnaşyklary institutynda Halkara Parahatçylyk güni mynasybetli institutyň Dünýä dilleri kafedrasynyň «Lingvo World» ylmy gurnagynyň guramagynda okuw sapagy geçirildi. Institutyň Halkara žurnalistikasy fakultetiniň I ýyl talyplarynyň gatnaşmagynda geçirilen okuw sapagyny Dünýä dilleri kafedrasynyň mugallymy Maýa Çaryýewa alyp bardy.
Häzirki wagtda dünýä ýurtlary bilen dost-doganlyk gatnaşyklaryny ösdürmek we berkitmek ýurdumyzyň daşary syýasatynyň möhüm ugurlarynyň biridir. Garaşsyz, hemişelik Bitarap döwletimizde dünýä ýurtlary bilen özara bähbitli hyzmatdaşlygy giňeltmek we çuňlaşdyrmak babatda ýola goýulýan gatnaşyklar täze many-mazmuna eýe bolýar. Türkmenistan diňe bir parahatçylygy söýüji ýurt hökmünde tanalman, eýsem, parahatçylygy dörediji, ösdüriji, berkidiji döwlet hökmünde hem tanalýar. Ýurdumyz parahatçylyk syýasatyna işjeň gatnaşýar, şeýle-de dünýäde bitaraplyk ýörelgesine esaslanýan parahatçylygy ynamly goldaýar. Ýeri gelende, Birleşen Milletler Guramasynyň Baş Assambleýasynyň 73-nji mejlisinde Türkmenistanyň başlangyjy bilen, 2021-nji ýyl «Halkara parahatçylyk we ynanyşmak ýyly» diýlip yglan edilendigini bellemelidiris.
2002-nji ýyldan bäri bellenilip gelinýän Halkara Parahatçylyk güni — Birleşen Milletler Guramasynyň Baş Assambleýasy tarapyndan milli we halkara derejesinde — ähli ýurtlaryň we halklaryň arasynda dünýä nusgalyk parahatçylygy pugtalandyrýan gün hökmünde yglan edildi. Bu sene mynasybetli bütin dünýäde dabaraly çäreler, konferensiýalar, maslahatlar geçirilýär.
Jahantäç ÖWEZOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.