«HAKYDA GÖWHERI” ESERINIŇ TERBIÝEÇILIK ÄHMIÝETINE BAGYŞLANAN OKUW SEMINARY
2025-nji ýylyň 20-nji maýynda Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň «Hakyda göwheri» atly ajaýyp kitabynyň «Taryha syýahat» atly bölüminiň many-mazmunyny açyp görkezmek maksady bilen, Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary fakultetiniň 1-nji ýyl talyplarynyň gatnaşmagynda okuw seminary geçirildi. Seminary institutyň Halkara ykdysady gatnaşyklary kafedrasynyň uly mugallymy Mährijemal Mämedowa alyp bardy.
Okuw sapagynda ykdysatçy talyplara türkmen halkynyň baý medeni mirasy, milli gymmatlyklary, gadymy taryhy ýadygärlikleri dogrusynda gyzykly maglumatlar barada gürrüň berildi. Eseriň türkmen halkynyň buýsançly taryhyny beýan edýän «Taryh şu ýerden başlanýar» atly bölüminde Altyndepe, gadymy Margiana siwilizasiýalary, Parfiýa döwleti, Beýik Seljukly döwleti hem-de Horezmşalar döwleti hakyndaky maglumatlar baradaky söhbetler okuw sapagynyň täsirliligini has-da artdyrdy.
Beýik Ýüpek ýolunyň ugrundaky Türkmenistanyň arhitektura ýadygärlikleri hakynda ýerleşdirilen maglumatlar bolsa, okuw sapagyna gatnaşan talyplara Türkmenistanyň gadymy söwda-ykdysady ýollaryny hem-de gurluşyk medeniýetiniň ösüşini taryhy nukdaýnazardan öwrenmäge ýardam etjekdigi şübhesizdir.
Eziz MÄTIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň I ýyl talyby.